ევროპის აკადემიის თბილისის ცენტრი (ჰაბი) საერთაშორისო პანელურ სესიებს იწყებს აღმოსავლეთ პარტნიორობის ქვეყნებში დემოკრატიზაციის პროცესების და ამ ქვეყნების ევროგაერთიანებაში ინტეგრეციის პრობლემებზე.
ცენრტმა წარმოადგინა 2022 წლის სამოქმედო გეგმა, რომელიც ითვალისწინებს ჰაბის მთავარ მისიას და გულისხმობს რეგიონში მეცნიერული ცოდნის გენერირებას, გავრცელებას, პოპულარიზაციას და ევროპული სტანდარტების გაზიარებას. ამ მიმართულებით მიმდინარე წელს იგეგმება შემდეგი ღონისძიებები: ა) საჯარო სემინარები გამორჩეული სემინარების სერიის — „გზაჯვარედინების” ფარგლებში; ბ) საერთაშორისო პანელური სესიები აღმოსავლეთ პარტნიორობის ქვეყნებში დემოკრატიზაციის პროცესების და ამ ქვეყნების ევროგაერთიანებაში ინტეგრაციის პრობლემებზე; გ) პოპულარული ლექციების ციკლი მიკრობიოლოგიის აქტუალურ საკითხებზე; დ) სეზონური სკოლები სხვადასხვა თემატიკაზე უკრაინელი და ქართველი მოსწავლეებისთვის; ე) გელათის აკადემიის შესახებ პროექტის ფარგლებში დაგეგმილი „სამაგიდო წიგნის“ ქართული და ინგლისური ვარიანტების მომზადება; ე) შუა საუკუნეების ქართული ფილოსოფიის და ხელოვნების შემსწავლელი ახალგაზრდა მეცნიერების საერთაშორისო კონფერენცია; ვ) კონფერენცია „მარი ბროსე — პირველი ევროპელი ქართველოლოგი“. დაგეგმილი ღონისძიებები განხორციელდება სხვადასხვა ეროვნულ და საერთაშორისო ორგანიზაციებთან თანამშრომლობით.
გელათის აკადემიის მნიშვნელობა შუა საუკუნეების აღმოსავლური
ქრისტიანული სამყაროს კულტურულ ცხოვრებაში
ევროპის აკადემიის თბილისის ცენტრმა, თსუ-ისა და თსუ-ის ქრისტიანული აღმოსავლეთის კვლევის ცენტრის თანამონაწილეობით, საფუძველი ჩაუყარა გრძელვადიან და მასშტაბურ პროექტს — „გელათის აკადემია — მეცნიერებისა და განათლების უძველესი კერა ქრისტიანულ აღმოსავლეთსა და დასავლეთს შორის“, რომლის იმპლემენტაციის პროცესი მოიცავს რამდენიმე ეტაპსა და მნიშვნელოვან ასპექტებს. პროექტის მიხედვით, გასული პერიოდის განმავლობაში გაიმართა რამდენიმე სამუშაო შეხვედრა, რომელთა შორის აღსანიშნავია 2021 წლის 22-24 ოქტომბერს ქ. ქუთაისის სახელმწიფო ისტორიული მუზეუმის შენობაში გამართული შეხვედრა. მასში საქართველოს სხვადასხვა სამეცნიერო დაწესებულებების წამყვანი მეცნიერების გარდა მონაწილეობა მიიღო ბიზანტიის ხელოვნების ცნობილმა სპეციალისტმა, პროფესორმა ენტონი ისტმონდმა, ს. კურტოლდის სახელობის ხელოვნების ისტორიის ინსტიტუტიდან (ლონდონი, დიდი ბრიტანეთი), რაც მეტყველებს იმ ფაქტზე, რომ აღნიშნული პროექტი საერთაშორისო მასშტაბებს იძენს. შეხვედრის მონაწილეთა შორის იყვნენ თსუ-ის რექტორი გიორგი შარვაშიძე და Academia Europaea-ს თბილისის ცენტრის აკადემიური დირექტორი დავით ფრანგიშვილი.
ქ. ქუთაისში გამართული შეხვედრის მთავარი თემა გახლდათ პროექტის ერთ-ერთი მნიშვნელოვანი ნაწილი — გელათის და გელათის აკადემიის შესახებ ორენოვანი (ქართული და ინგლისური) ე. წ. „სამაგიდო წიგნის“ გამოცემა. ამ წიგნის მიზანია თავი მოუყაროს გელათის და გელათის აკადემიის შესახებ დღემდე სხვადასხვა მიმართულებით წარმოებულ სამეცნიერო კვლევებს (ისტორია, ფილოსოფია, ფილოლოგია, არქიტექტურა, სახვითი ხელოვნება, მუსიკათმცოდნეობა) და, ამ მასალის შეჯამებისა და კომპლექსური ანალიზის საფუძველზე, წარმოაჩინოს გელათის აკადემიის მნიშვნელობა შუა საუკუნეების აღმოსავლური ქრისტიანული სამყაროს კულტურულ ცხოვრებაში.
აღნიშნული პროექტის ფარგლებში, ევროპის აკადემიის თბილისის ჰაბმა, როგორც მეცნიერებათა პანევროპული აკადემიის ნაწილმა, დააარსა ყოველწლიური სასკოლო-საგანმანათლებლო კონკურსების ციკლი „სკოლა — მეცნიერების საწყისი“, რომელიც მიზნად ისახავს სკოლის მოსწავლეებში სამეცნიერო კვლევის უნარების განვითარებას ცოდნის სხვადასხვა დარგში. ციკლის პირველი კონკურსის თემა შეეხო გელათის აკადემიას, როგორც ევროპის ერთ-ერთ უძველეს საგანმანათლებლო და სულიერ-ინტელექტუალურ ცენტრს. კონკურსის სამიზნე აუდიტორია გახლდათ საქართველოს საჯარო და კერძო სკოლების IX — XII კლასების მოსწავლეები. მასში მონაწილეობა მიიღეს აწყურის, გორის, ლაგოდეხის, მარტვილის, ოზურგეთის, ქარელის და სხვა მუნიციპალიტეტების სკოლის მოსწავლეებმა. კონკურსის დასკვნით შეხვედრაზე, ექსპერტებისგან შემდგარმა კომისიამ გამოვლინა ფინალისტები და გამარჯვებულები, რომელთაც დაჯილდოვების ცერემონიაზე გადაეცათ ფასიანი საჩუქრები და სერტიფიკატები. დასკვნით ცერემონიას თბილისის სახელმწიფო უნივერსიტეტმა უმასპინძლა.
ცენტრს პასტერის ინსტიტუტის საპატიო პროფესორი ხელმძღვანელობს
დავით ფრანგიშვილი წლების მანძილზე მოღვაწეობდა პარიზის პასტერის ინსტიტუტში და ის დღემდე გახლავთ პასტერის ინსტიტუტის საპატიო პროფესორი. გარდა ამისა, ის არის ევროპის მეცნიერებათა აკადემიის Academia Europaea“-სა და ევროპის მიკრობიოლოგიის აკადემიის წევრი, საქართველოს ეროვნული მეცნიერებათა აკადემიის უცხოელი წევრი. როგორც Academia Europaea“-ს თბილისის ჰაბის აკადემიური დირექტორი, თსუ მოწვეული პროფესორი და საქართველოს მიკრობიოლოგთა ასოციაციის სულისჩამდგმელი და პრეზიდენტი, იგი ხელს უწყობს სამეცნიერო ცოდნის პოპულარიზაციას და ქართველი მეცნიერების ჩართვას ევროპულ აკადემიურ სივრცეში. ევროპის აკადემიის თბილისის ჰაბის ყველა პროექტი მისი თაოსნობით და უშუალო ჩართულობით ხორციელდება.
