საქართველოში უკრაინის ელჩის მოვალეობის შემსრულებელმა ანდრეი კასანოვმა ყველას მოუწოდა — თავი შეიკავოს სპეკულაციებისაგან. დიპლომატი გამოეხმაურა ქართული რძის პროდუქტების რუსულ ბაზარზე დაშვების თემას. ელჩის მოვალეობის შემსრულებელმა თქვა, რომ ამ საკითხზე უკრაინის საგარეო საქმეთა სამინისტროს რეაგირება ჰქონდა. მან მადლობა გადაუხადა ქართულ მხარეს განმარტებისა და მხარდაჭერისთვის. კასანოვმა აღნიშნა, რომ დაუშვებელია რუსულ კომპანიებთან თანამშრომლობა, რაც კრემლს დამატებით რესურსს აძლევს — გააგრძელოს ომი.
„საქართველო უკრაინას გვერდით უდგას ჰუმანიტარული დახმარების თვალსაზრისით. 6 მარტს უკრაინაში გაიგზავნა მორიგი თვითმფრინავი: 40 ტონა ჰუმანიტარული ტვირთი, მედიკამენტები, სურსათი, ტანსაცმელი და ყოველივე ის, რაც ახლა საჭიროა უკრაინის მოსახლეობისათვის. ეს არის ძალიან დროული და მნიშვნელოვანი დახმარება. უკრაინის საელჩო მადლიერებას გამოთქვამს, უპირველეს ყოვლისა, საქართველოში ყველა უკრაინელის მიმართ, ასევე საქართველოს მოქალაქეების, მთავრობისა და მართლმადიდებელი ეკლესიის მიმართ, ასეთ რთულ დროს, უკრაინის მხარდაჭერისთვის.
ჩვენ ვაგრძელებთ კონსულტაციებს ჩვენს ქართველ პარტნიორებთან ერთად და მადლობლები ვართ იმ განმარტებისთვის, რომელიც გააკეთა საქართველოს ეკონომიკის მინისტრმა, ბატონმა ლევან დავითაშვილმა. ჩვენ მოვუწოდებთ ყველას — თავი შეიკავოს სპეკულაციებისგან. დაუშვებელია რუსულ კომპანიებთან თანამშრომლობა, რაც რუსეთს დამატებით რესურსს აძლევს გააგრძელოს ომი.
მინდა, მივმართო საქართველოს ყველა მოქალაქეს: თქვენ არაჩვეულებრივები ხართ! აღფრთოვანებული ვარ უკრაინელების მხარდაჭერის დონით — ჰუმანიტარული დახმარება, სოლიდარობის აქციები უკრაინის მხარდასაჭერად, თანხის შეგროვება საქართველოს ტერიტორიაზე, თქვენს ოჯახებში, უკრაინელების დაბინავებასთან დაკავშირებული წინადადებები, ყვავილები საელჩოსთან. ყველა ხიდი, ქუჩა, გაჩერება უკრაინის დროშის ფერებშია… ჩვენ, უკრაინელები, ვგრძნობთ, რომ ყოველთვის ჩვენ გვერდით ხართ და უკრაინასთან ერთად მზად ხართ იბრძოლოთ დამოუკიდებლობისთვის, დემოკრატიისთვის და თქვენი თავისუფალი არჩევანისათვის.
