უკრაინის დედაქალაქში მოქმედი აპლიკაცია, რომელსაც მოქალაქეები საზოგადოებრივი ტრანსპორტის ბილეთების შესაძენად იყენებდნენ, ახლა მათ საჰაერო თავდასხმების შესახებ ამცნობს და მომხმარებლებს თავშესაფრისკენ მიმავალ გზას უჩვენებს.
ომამდე „კიევ დიჯიტალის“ აპლიკაციას ქალაქის მაცხოვრებლები სატრანსპორტო ბილეთების შესაძენად, პარკინგის ან კომუნალური გადასახადების გადასახდელად იყენებდნენ.
ახლა კი „კიევ დიჯიტალი“ სამაშველო ინსტრუმენტია, რომელიც წინასწარ ატყობინებს მომხმარებელს შესაძლო საჰაერო თავდასხმების შესახებ. ამასთან, აპლიკაცია მომხარებლებს აწვდის ინფორმაციას უახლოესი თავშესაფრებისა და ბენზინის მარაგების შესახებ.
ქვეყნის ციფრული ტრანსფორმაციის მთავარი წარმომადგენლის, კიევის ვიცე-მერის პეტრო ოლენიჩის დახმარებით, აპლიკაციის კონცეფცია რუსეთის უკრაინაში შეჭრიდან სულ რაღაც 24 საათში შეიცვალა. უკრაინაში აცხადებენ, რომ აპლიკაციას ახლა 1,5 მილიონი მომხმარებელი ჰყავს.
„კიევ დიჯიტალი“ ქალაქისთვის შეუცვლელი ინსტრუმენტი გახდა. აპლიკაცია მოქალქეებს ისეთ სიახლეებს აწვდის, როგორიცაა თავშესაფრების რუკა, ხელმისაწვდომი აფთიაქების რუკა, ინფორმაცია ინსულინის უახლოესი მარაგების შესახებ, სასურსათო მაღაზიების რუკა, იმ პუნქტების მისამართები, სადაც უფასო წყალი და პურია, შინაური ცხოველების მაღაზიები, ჰუმანიტარული ორგანიზაციების შტაბ-ბინები და მრავალი სხვა.
ციფრული ომის მხარდაჭერის ნაწილში მთავრობამ მთელი ქალაქის მასშტაბით გააძლიერა წვდომა უკაბელო ინტერნეტზე, ასევე, უზრუნველყო ინტერნეტ-ბმულები 200-ზე მეტ თავშესაფარში, რათა მოსახლეობამ უკეთ მოახერხოს საგანგებო საინფორმაციო სამსახურებთან დაკავშირება და ახლობლებთან მუდმივ კონტაქტზე დარჩენა.
„ჩვენი სერვისების ადაპტაცია უნდა მოვახერხოთ და ამას ვაკეთებთ კიდეც. კიევი და უკრაინის სხვა ქალაქები იმაზე შეუფერხებლად და პროდუქტიულად მუშაობენ, ვიდრე ოდესმე. მიზეზი აშკარაა. ჩვენ ვიცავთ ჩვენს ქვეყანას, ჩვენს ქალაქებს, ჩვენს მოსახლეობას, ჩვენს მშობლებს, ჩვენს შვილებს და ჩვენს მომავალს. ეს ჩვენი სახლია, ამიტომ ჩვენ ვიბრძოლებთ ბოლომდე“, — ნათქვამია ოლენჩის განცხადებაში.
უკრაინის მთავრობის მოთხოვნით „გუგლმა“ ქვეყნის მასშტაბით ანდროიდის ტელეფონებისთვის სწრაფი საჰაერო გაფრთხილების სისტემები განათავსა.
„ეს ნამუშევარი ემატება ქვეყანაში არსებულ საჰაერო თავდასხმის გაფრთხილების სისტემებს და ეფუძნება უკრაინის მთავრობის მიერ უკვე მოწოდებულ გაფრთხილებებს“, — ნათქვამია კომპანიის ბლოგში.
წყარო — „გარდიანი“
