ვაშინგტონის გაზეთი „ჰილი“ (The Hill) აქვეყნებს სტატიას სათაურით „აშშ–ის ეკონომიკაში შექმნილი „ცუდი ამინდის“ გამო ჯო ბაიდენის რეიტინგი მცირდება“ (ავტორი — ქეროლაინ ვაკილი), რომელშიც მიმოხილულია ტელეარხ „სი-ენ-ბი-სი“-ს (CNBC) მიერ 7-10 აპრილს ჩატარებული საზოგადოებრივი აზრის გამოკითხვის შედეგები.
როგორც სტატიაშია აღნიშნული, ამერიკელების ყველაზე მეტ უკმაყოფილებას იწვევს ის, თუ როგორ უმკლავდება თეთრი სახლის მეთაური ქვეყნის წინაშე მდგარ ეკონომიკურ სიძნელეებს და როგოც ცდილობს უკრაინის კონფლიქტის დარეგულირებას.
გამოკითხვის შედეგებით ირკვევა, რომ პრეზიდენტის რეიტინგი ვარდნას აგრძელებს. ამერიკელებმა ჯო ბაიდენის საქმიანობას ძალზე დაბალი შეფასება მისცეს — ამერიკელების 53% თეთრი სახლის მეთაურის საქმიანობას არ იწონებს, თუმცა მას ერთგული მხარდამჭერებიც საკმაო რაოდენობით ჰყავს, შედარებით ნაკლები, მაგრამ მაინც — 38%. აღსანიშნავია, რომ გასული წლის ივლისის თვეში ჯო ბაიდენს მხარს მოსახლეობის 48% უჭერდა, დეკემბერში — 41%.
ამერიკელები პესიმისტურად აფასებენ თავიანთ ფინანსურ მდგომარეობას — 43% ვარაუდობს, რომ მიმდინარე და მომავალი წლის განმავლობაში სიტუაცია გაუარესდება. ჯო ბაიდენის ეკონომიკურ კურსს მხარს უჭერს გამოკითხულთა მხოლოდ 35%, 60% კი მის წინააღმდეგ გამოდის. 47% ქვეყნის ეკონომიკურ მდგომარეობას „ძალიან ცუდ“ შეფასებას აძლევს.
რაც შეეხება ამერიკელების თვალსაზრისს პრეზიდენტის დამოკიდებულების თაობაზე რუსეთ-უკრაინის ომის მიმართ: 10 ამერიკელიდან 4 იწონებს ჯო ბაიდენის ძალისხმევას, ხოლო 10-დან 5 მხარს არ უჭერს.
„ესოდენ დაბალი შეფასებები ბევრი ფაქტორით არის განპირობებული. ამერიკელებს მიაჩნიათ, რომ პრეზიდენტი „ჟონგლიორობს“ — არასერიოზული დამოკიდებულებას იჩენს — ქვეყნის შიგნით და გარეთ არსებული მრავალი პრობლემის მიმართ, კერძოდ, მუდმივად მაღალი ინფლიაციის, პროდუქციის მიწოდების ციკლის დარღვევის, „კოვიდ-19“-ის გაჭიანურებული პანდემიის და უკრაინის კონფლიქტის მიმართ, რომელიც, თავის მხრივ, ნეგატიურ გავლენას ახდენს როგორც საწვავის, ასევე სურსათისა და საკვები პროდუქტების მსოფლიო ფასებზე“, — ასეთი დასკვნაა გაკეთებული სტატიის დასასრულს.