პრეზიდენტის დასავლურმა ვიზიტმა და ევროპიდან გაკეთებულმა განცხადებებმა მასზე გამწყრალ ოპოზიციას აშკარად გული მოულბო. სალომე ზურაბიშვილის მიმართვამ გარკვეული სენტიმენტები საზოგადოების იმ ნაწილშიც კი გამოიწვია, რომელიც მას, ცოტა ხნის წინ, ივანიშვილის დანიშნულ პრეზიდენტს უწოდებდა.
ყველაზე მეტად, ვისი გულის მოგებაც სალომე ზურაბიშვილმა აშკარად ვერ მოახერხა, პოლიტიკოსი შალვა ნათელაშვილია, რომელიც აცხადებს, რომ პრეზიდენტი დედალი ივანიშვილია.
ზოგადად, სოციალურ ქსელებში გავრცელებული შეფასებების თანახმად, პრეზიდენტის დღევანდელი საპარლამენტო მოხსენება ერთნაირად პასუხობდა როგორც ოპოზიციის, ისე მმართველი გუნდის კრიტიკას. ამიტომ არ არის გასაკვირი, რომ ყველაზე მეტად, ამჯერად, მესამე პოლიტიკურ ორბიტაზე მოაზრებული პარტიები დარჩნენ კმაყოფილნი სალომე ზურაბიშვილის პარლამენტში გამოსვლით და იმ აქცენტებით, რაც პრეზიდენტმა მართლაც პირველად გაახმოვანა.
„მადლობა საქართველოს პრეზიდენტს, რომელმაც დღეს საქართველოს პარლამენტის ტრიბუნიდან ღირსეულად გააჟღერა ქართველი ერის ხმა“, — გიორგი გახარიას ასეთი გამოხმაურების შემდეგ გასაგებია — გულგრილია თუ არა ყოფილი პრემიერი და მისი გუნდი პრეზიდენტის პრინციპული პოზიციის დეკლარირებით.
სალომე ზურაბიშვილის მოხსენების რა ნაწილმა დაიმსახურა პარტია „საქართველოსთვის“ მადლობა, ამაზე დეპუტატ ბექა ლილუაშვილს გავესაუბრეთ:
— პრეზიდენტის საპარლამენტო გამოსვლით ამომწურავად გამოიხატა ქართველი ხალხის პოზიცია და მეორე — არა თუ ახლა, არამედ ჩვენ, „პარტია საქართველოსთვის“, მუდმივად ვაპელირებთ, მოვუწოდებთ ხელისუფლებას და ოპოზიციას იმისკენ, რომ საზოგადოებაში რადიკალიზაცია ამ ქვეყნის პირველი პრობლემაა, რომელიც უნდა გადაიჭრას, განსაკუთრებით დღეს, როცა ქვეყნის მომავალი ათწლეულების განვითარება დევს სასწორზე. წარმოუდგენელია „ქართული ოცნებისა“ და „ნაციონალური მოძრაობის“ მხრიდან ისეთი განცხადებების კეთება, რაც კიდევ უფრო გააღრმავებს ამ რადიკალიზმს. ეს ეწინააღმდეგება ქვეყნის განვითარებისა და ევროინტეგრაციის პერსპექტივების რეალიზებას.
სამწუხარო ის არის, რომ დღეს, როცა ქვეყანას სჭირდება საზოგადოების სრული გაერთიანება და მობილიზაცია, არც „ქართულ ოცნებას“ და არც „ნაციონალურ მოძრაობას“ ამის შესაძლებლობა არ აქვთ. მათ არ სურთ — უფრო მაღლა დააყენონ ქვეყნის ინტერესები, რადგან მათი ამოცანა მხოლოდ პარტიული ინტერესებისთვის ზრუნვაა. ეს არის სახელმწიფოს პირდაპირი დაზიანება და არა მარტო მათი პარტიების.
— თქვენს პარტიას რა სიახლის შემოტანა შეუძლია არსებულ პოლიტიკურ მოცემულობაში?
— ჩვენი გეგმა არაერთხელ წარვადგინეთ, მათ შორის, მოიაზრებოდა ისეთი საკითხები, როგორიც არის, მაგალითად: შეიქმნას ისეთი სპეციალური დანიშნულების სახელმწიფო უწყება, რომელიც პასუხისმგებელი იქნება ევროინტეგრაციის პროცესის წარმართვაზე, რისი შესაძლებლობის ფანჯარაც საქართველოს აქვს. დღეს გაისმა კიდეც პრეზიდენტის ინიციატივებში — შეიქმნას სახელმწიფო მინისტრის აპარატი ამავე მანდატით. ჩვენ გვქონდა საუბარი და მოწოდება უსაფრთხოების გაფართოებული საბჭოს შექმნის თაობაზე. მეტიც, ჩვენ, ასევე, მოვითხოვეთ პარლამენტში ნდობის ჯგუფის გაფართოება, რათა საზოგადოების ყველა წარმომადგენელს ჰქონდეს მასში მონაწილეობის შესაძლებლობა და ჰქონდეს სწორი ინფორმაცია — რა სჭირდება ამ ქვეყანას, რა საკითხებია პრიორიტეტული?
— როგორ წარმოგიდგენიათ უსაფრთხოების გაფართოებულ საბჭოში ისეთი ოპოზიციონერი პოლიტიკოსების ჩართვა, რომლებიც საერთაშორისო არენაზე არ ერიდებიან ქვეყნისთვის დამაზიანებელი განცხადებების კეთებას?
დღეს ყველამ უნდა გამოიჩინოს მაღალი პასუხისმგებლობა საზოგადოებისა და სრულიად ქართველი ხალხის წინაშე და თავი უნდა შეიკავოს ქვეყნის დამაზიანებელი განცხადებების გაკეთებისგან. რაც შეეხება ამ კონკრეტულ თემას, ეს პროცესი მსჯელობის საგანია და შემდეგ შესაბამისი გადაწყვეტილება პარლამენტმა უნდა მიიღოს. ამიტომ ჯერ არ ვიცი — ვისი კანდიდატურა იქნება წარმოდგენილი და როგორ. ეს გამოჩნდება მომავალში, თუ ხელისუფლებამ მსგავსი ნაბიჯები გადადგა.
