უცნობმა, იგივე, მომღერალმა და „მაესტროს“ გადაცემა — „კიდობანის“ წამყვანმა გია გაჩეჩელაძემ საქართველოს პარლამენტის თავმჯდომარეს წერილით მიმართა საკანონმდებლო ინიციატივის განსახორციელებლად, რაც მედიაში ცილისწამების საკითხზე რეგულაციების შემოტანას ითვალისწინებს. გია გაჩეჩილაძის მიმართვის საფუძველი გახდა პირადი მაგალითი, როდესაც მის წინააღმდეგ ცილისმწამებლური ინფორმაცია გაარცელა ტელეკომპანია „მთავარმა“.
ცილისწამება უნდა იყოს თუ არა დასჯადი? — ამ კითხვით მივმართეთ ექსპერტსა და ცნობილ ფსიქოლოგს რამაზ საყვარელიძეს, რომელსაც წარსულში, როგორც პარლამენტის პრესის კომიტეტის ყოფილ თავმჯდომარეს, პრესის კანონზე მუშაობის დიდი გამოცდილება აქვს.
„ცილისწამება სისხლის სამართლის კოდექსით დასჯადი არ უნდა იყოს, ანუ ციხეში არავინ უნდა ჩაჯდეს ამის გამო. თუმცა, ცილისწამებისთვის მედიის წარმომადგენელს ჯარიმა უნდა გადაახდევინო. მსოფლიოში ეს დასჯადია, რასაც სამოქალაქო კოდექსი განსაზღვრავს“, — აცხადებს რამაზ საყვარელიძე. ექსპერტს მოჰყავს ვალერი ასათიანის მაგალითი, რომელმაც სასამართლოში დავა მოიგო. მას სექტანტობა დააბრალეს და საკუთარი სიმართლის დასაცავად სასამართლოს მიმართა.
ახალი რეგულაციის შემოღების შემთხვევაში რამდენად შესაძლებელია, რომ ხელისუფლებას მივცეთ ბერკეტი — ხელი შეუშალოს თუნდაც საგამოძიებო ჟურნალისტიკის თავისუფლად წარმოებას? — ამ კითხვაზე რამაზ საყვარელიძე გვპასუხობს: „გაითვალისწინეთ, დღეს, საქართველოში, უფრო სახიფათოა ოპოზიცია, ვიდრე ხელისუფლება, რადგან ოპოზიცია შეიარაღდა არა ადმინისტრაციული ძალით, არამედ ბულინგით. თუ ოპოზიციის დისკრედიტაციას მოახდენ, აუცილებლად დაგაბულინგებენ. როცა საუბარია იმაზე, რომ საგამოძიებო ჟურნალისტიკა იყოს დაცული, ძირითადად, საუბარია ხოლმე ხელისუფლების ადმინისტრაციული ზეგავლენისაგან დაცულობაზე, მაგრამ, აი, ოპოზიციის ბულინგისგან და საზოგადოების ბულინგისგან რომ იყოს დაცული საგამოძიებო ჟურნალისტიკა — ეს პრობლემა ისე მწვავედ არსადაა მსოფლიოში, როგორც საქართველოში“.
