ევროკომისიის პრეზიდენტმა, ურსულა ფონ დერ ლაიენმა რუსეთის წინააღმდეგ შემუშავებული სანქციების ნაწილი გაასაჯაროვა. ფონ დერ ლაიენმა განაცხადა, რომ უკრაინაში შეჭრის შემთხვევაში რუსეთი საერთაშორისო ფინანსურ ბაზარს მოსწყდება და ევროზონაში ძირითადი პროდუქციის ექსპორტიც აეკრძალება.
„რუსეთი საერთაშორისო ფინანსურ ბაზრებს გამოეთიშება. Სანქციები დაწესდება ყველა იმ პროდუქტზე, რომელსაც ვაწარმოებთ და რომელიც რუსეთს ეკონომიკის მოდერნიზებისა და დივერსიფიცირებისთვის სასიცოცხლოდ სჭირდება, ამ სფეროში გლობალური ლიდერები ჩვენ ვართ და მათ ჩვენი შემცვლელი არ ჰყავთ“, — აღნიშნა ფონ დერ ლაიენმა.
ფონ დერ ლაიენის თქმით, სანქციები დაწესდება ყველა საქონელზე, რომელსაც ევროკავშირი აწარმოებს და რომელიც რუსეთისთვის სასიცოცხოდ მნიშვნელოვანია. ევროკავშირის აღმასრულებელი ორგანოს თავმჯდომარე ურსულა ფონ დერ ლაიენი თვლის, რომ საწვავის ექსპორტზე დამოკიდებულება რუსეთის სისუსტეა.
„საწვავი რუსეთის ექსპორტის ორ მესამედს და მისი ბიუჯეტის ნახევარს შეადგენს“, — ამბობს ფონ დერ ლაიენი.
ევროკომისიის პრეზიდენტის განცხადებით, რუსეთის ეკონომიკას მოდერნიზება სჭირდება, რაც დასავლეთის მხრიდან სანქციების დაწესების შეთხვევაში შეუძლებელი იქნება.
ფონ დერ ლაიენმა ყურადღება გაამახვილა იმაზეც, რომ სანქციები მხოლოდ იმ შემთხვევაში შევა ძალაში, თუ რუსეთი უკრაინაში შეიჭრება. „როიტერი“ წერს, რომ ამ განცხადებით ევროკომისიის პრეზიდენტი უკრაინის პრეზიდენტის, ვოლოდომირ ზელენსკის მოწოდებას ეხმაურება, სადაც ზელენსკიმ რუსეთისთვის სანქციების დაუყოვნებლივ დაწესება ითხოვა.
„სანქციების დაწესება საკმაოდ მასშტაბური და თანმიმდევრული პროცესია. ჩვენ ვიცით, რომ ევროკავშირმა ყოველთვის უნდა მისცეს რუსეთს დიპლომატიისა და მოლაპარაკებების მაგიდასთან დაბრუნების შანსი. ეს ფანჯარა ჯერ კიდევ ღიაა“, — ამბობს ფონ დერ ლაიენი.
დასავლელი ლიდერები რუსეთის უკრაინაში შეჭრის შემთხვევაში მათი შეთანხმებული სანქციების სრული დეტალების გამხელაზე, ჯერჯერობით, უარს ამბობენ. ისინი გამორიცხავენ სამხედრო ჩარევას, თუმცა საუბრობენ უპრეცენდენტო ეკონომიკურ სანქციებზე.
რუსეთი, რომელსაც უკრაინის ჩრდილოეთ და აღმოსავლეთ საზღვრებთან, დაახლოებით, 150 000 ჯარისკაცი ჰყავს განლაგებული, დასავლეთისგან ითხოვს გარანტიებს, რომ უკრაინა არასოდეს შეუერთდება ნატოს. რუსეთის ფედერაციის პრეზიდენტმა, ვლადიმერ პუტინმა განაცხადა, რომ რუსეთს გრძელვადიანი უსაფრთხოებისთვის გარანტიები სჭირდება.
ინფორმაციას სააგენტო „როიტერი“ ავრცელებს.
მოამზადა ლუკა ჯინჭარაძემ
