„საზოგადოება უნდა იცნობდეს კეთილსინდისიერ, პროფესიონალ და გულისხმიერ სახელმწიფო მოხელეებს. მსურს, საჯაროდ მადლობა გადავუხადო საქართველოს საგანგებო და სრულუფლებიან ელჩს კატარის სახელმწიფოში, ბატონ ნიკოლოზ რევაზიშვილს. ამ ადამიანმა დიპლომატიური მისიის სხვა თანამშრომლებთან ერთად, უმოკლეს დროში ყველაფერი გააკეთა საქართველოს მოქალაქის (ჩემი ოჯახის წევრის) დასახმარებლად, მისი ჯანმრთელობის და სიცოცხლის დასაცავად. საამაყო და სასიამოვნოა, როდესაც განსაცდელში მყოფი, საკუთარი სახელმწიფოს თანადგომას გრძობ იმ ქვეყანაში შენი თანამემამულე, უაღრესად ყურადღებიანი, პროფესიონალი და ღირსეული დიპლომატების მეშვეობით!“, — ასეთი მადლობის წერილი გამოაქვეყნა პოლიტიკოსმა ვატო შაქარიშვილმა, რომელმაც ჩვენთან საუბარში განმარტა, რომ მისი ოჯახის წევრს, რომელიც მოფრინავდა დოჰას გავლით, აეროპორტში, სავარაუდოდ, მიკრო ინსულტი მოუვიდა… ის აღმოჩნდა კატარში, უცხო ქვეყანაში მარტო… ვატო შაქარიშვილი დაუკავშირდა სრულუფლებიან ელჩს კატარის სახელმწიფოში, ბატონ ნიკოლოზ რევაზიშვილს, რომელიც გულისხმიერებით მოეკიდა ამ ამბავს და უმოკლეს დროში მიიღო ზომები…
„როგორც ჩანს, გარდა იმისა, რომ ის გამოცდილი დიპლომატია, ამავდროულად, აქტიური, სერიოზული კონტაქტები აქვს იმ ქვეყანაში, სადაც მუშაობს… ბატონი ნიკოლოზისგან მივიღეთ ინფორმაცია, რომ დახმარება და ყურადღება არ აკლია ჰოსპიტალში ჩვენი ოჯახის წევრს. მადლობას ვუხდი, ასევე, ჩვენს თანამემამულე დიმიტრი ოგანესიანს, რომელიც წამყვან პოზიციაზეა იქაურ სამედიცინო კორპორაციაში“, — აცხადებს ვატო შაქარიშვილი.
