უკრაინის პრეზიდენტმა ვოლოდიმირ ზელენსკიმ ევროპის შვიდი ქალაქის მთავარ მოედნებზე შეკრებილ ადამიანებს პირდაპირი ჩართვის რეჟიმში მიმართა. მან ევროპას მადლობა გადაუხადა თანადგომისთვის და კიდევ ერთხელ მოუწოდა მხარდაჭერისკენ.
„თუ უკრაინა გაიარჯვებს, ევროპაც გაიმარჯვებს! თუ უკრაინა დაეცემა, ევროპაც დაეცემა! დღეს ყველა უკრაინელები ხართ. გმადლობთ ამისთვის!“ – აცხადებს უკრაინის პრეზიდენტი.
პარლამენტის საგარეო ურთიერთობის კომიტეტის თავმჯდომარის მოადგილე გიორგი ხელაშვილი ასე ეხმაურება რუსთაველის გამზირზე შეკრებილი საზოგადოების წინაშე მონიტორზე ორი ქვეყნის პრეზიდენტების გამოჩენას.
„ის მადლობა, რომელიც უკრაინის პრეზიდენტმა გადაუხადა მსოფლიო თანამეგობრობას და, მათ შორის, საქართველოს, ძალიან მნიშვნელოვანი და დასაფასებელია, რადგან ადამიანი, მთავრობა, რომელიც კატასტროფის შუაგულშია, პოულობს დროს იმისათვის, რომ მადლიერება გამოხატოს. დარწმუნებული ვარ, ყველა, განსაკუთრებით კი რუსთაველის გამზირზე შეკრებილი ადამიანები, ამას იაზრებენ და აფასებენ.
მონიტორზე საქართველოს პრეზიდენტის სალომე ზურაბიშვილის გამოჩენას მოულოდნელობის ეფექტი ჰქონდა, რადგან ეს არ იყო წინასწარ დაგეგმილი. ვფიქრობ, უკრაინისა და საქართველოს პრეზიდენტების ერთად გამოსვლა ნიშნავს იმას, რომ ამ ორი ქვეყნის ადგილი რეგიონულ უსაფრთხოებაში არის გვერდიგვერდ. ჩვენ ერთდ მივდივართ დასავლეთისკენ და მნიშვნელოვანია, რომ პოლიტიკურადაც ერთად ვიდგეთ, რისი განსახიერებაც იყო ორი პრეზიდენტის ერთობლივი მიმართვა“, – აცხადებს გიორგი ხელაშვილი.
„მე ვდგავარ იქ, სადაც უნდა ვიყო – პრეზიდენტ ზელენსკის გვერდით! ქართველი ერის ღირსებაა, რომ ვიდგეთ იქ, სადაც თავისუფლებისთვის, დამოუკიდებლობისთვის, ევროპული მომავლისთვის იბრძვის ჩვენი მეგობარი ქვეყანა. თქვენ ხართ ხალხი, რომელიც ახლა საქართველოს ღირსებას წარმოადგენს!“ – სალომე ზურაბიშვილი.
