კოვიდის საწინააღმდეგო, ბიოლოგიურად აქტიური კვებითი დანამატი — პრეპარატი „სულანჟერი” თბილისის სახელმწიფო სამედიცინო უნივერსიტეტის პროფესორმა, ჯანდაცვის სამინისტროს ექსპერტმა სამედიცინო ონკოლოგიისა და კლინიკური გენეტიკის საკითხებში ალექსანდრე თავართქილაძემ შექმნა. პრეპარატის კლინიკური ცდები ჩატარდა თბილისის რესპუბლიკურ საავადმყოფოში, „მიხაილოვის“ საავადმყოფოსა და საჩხერის კლინიკაში. საქართველოსა და უცხოეთში ჩატარებულმა ფართო კვლევებმა დაამტკიცა, რომ ეს პრეპარატი არის აქტიური. ალექსანდრე თავართქილაძემ ამის შესახებ მოხსენება საქართველოს ეროვნულ მეცნიერებათა აკადემიაში ბიო სამედიცინო კვლევების საკოორდინაციო საბჭოს სხდომაზე გააკეთა. დაისვა საინტერესო კითვები და დაისახა სტრატეგიული გეგმები — თუ როგორ უნდა გახდეს ეს პრეპარატი მოსახლეობისთვის ხელმისაწვდომი.
როგორ უნდა გახდეს პრეპარატი მოსახლეობისთვის ხელმისაწვდომი?
როგორც საქართველოს ეროვნულ მეცნიერებათა აკადემიის პრეზიდენტმა გიორგი კვესიტაძემ აღნიშნა: „მცენარეული პრეპარატები თითქმის ყველა დაავადებების სამკურნალოდ არის შექმნილი და ისინი დიდი წარმატებით სარგებლობენ. საქართველოში გაგვაჩნია 1100 ენდემური მცენარე და ამ მცენარეების პოტენციალს გამოყენება უნდა. მცენარეული წამლები გამოყენებამდე აუცილებლად უნდა იქნას სიღრმისეულად შესწავლილი. პრეპარატ „სულანჟერი”-ს გამოყენებამ პაციენტებში კარგი შედეგები მოგვცა და ვფიქრობ, რომ ამ წამალს კარგი პერსპექტივა აქვს არა მარტო საქართველოს, მსოფლიო მასშტაბითაც“.
პრეზენტაციაზე პრეპარატის კვლევებსა და მნიშვნელობაზე ისაუბრეს აკადემიკოსმა, პროფესორმა რამაზ ხეცურიანმა, საქართველოს მეცნიერებათა ეროვნული აკადემიის პრეზიდენტმა, აკადემიკოსმა გიორგი კვესიტაძემ, ჯანმრთელობის მსოფლიო ორგანიზაციის მუდმივმოქმედი კონგრესის წევრმა, საქართველოს ჯანდაცვის სამინისტროს წარმომადგენელმა ელენე ამირეჯიბმა, მედიცინის მეცნიერებათა დოქტორმა რამაზ ყურაშვილმა და სხვა.
* * *
ქიმიურად სინთეზირებული წამლები ორგანიზმში მოხვედრის შემდეგ არიან ბიოდეგრადირებადი და ორგანიზმს არ გააჩნია ის ფერმენტული სისტემები, რომელიც მას დაშლის. მცენარეული პრეპარატები კი ორგანიზმისთვის არ არის საშიში და გვერდითი მოვლენებიც ნაკლებად გააჩნიათ. ამიტომ, მცენარეული პრეპარატების შექმნა და მისი პოპულარიზაცია დღეს უაღრესად მნიშვნელოვანია იმისთვის, რომ თავიდან ავიცილოთ ქიმიურად სინთეზირებული წამლების საფრთხეები — სწორედ ეს საკითხები იყო მსჯელობის საგანი მეცნიერებათა აკადემიაში გამართულ ბიო სამედიცინო კვლევების საკოორდინაციო საბჭოს სხდომაზე.
ახალ ქართულ ბიოლოგიურ პრეპარატზე — „სულანჟერი“ — დაკვირვება ობსერვაციული კვლევის სახით საქართველოში, ჰოსპიტალურ პირობებში, 155 პაციენტზე ჩატარდა. პრეპარატის შესახებ ავტორის მოხსენება სამედიცინო და ბიოლოგიურ მეცნიერებათა საკოორდინაციო მეთოდოლოგიურმა საბჭომ დადებითად შეაფასა. თუმცა ეს ჯერ მხოლოდ დასაწყისია! პრეპარატს წინ კიდევ დიდი გზა აქვს…
როგორც პრეპარატის შექმნაში მონაწილე ბიზნესმენმა დავით ხიდაშელმა აღნიშნა, მას სულ ახლო მომავალში გაუხსნის გზას არაერთი ქვეყანა. იმედია, ქართველი ექიმისა და მკვლევრის — ალექსანდე თავართქილაძის პრეპარატი თავს დაიმკვიდრებს საერთაშორისო სამედიცინო სამყაროში და, რაც მთავარია, დიდ შვებას მოჰგვრის ავტორის თანამემამულეებს, ქართველ პაციენტებს.
მოამზადა თამარ დადიანმა
