ქართული ფილმის მოყვარულები მერაბ კოკოჩაშვილის ახალი ფილმის პრემიერის მოლოდინში არიან. რა სირთულეები შეხვდა შემოქმედებით ჯგუფს გადაღებებისას და როდის უნდა შედგეს პრემიერა? — ამაზე თავად ფილმის რეჟისორი და სცენარის ავტორი მერაბ კოკოჩაშვილი გვესაუბრება.
„ტერცო-მონტო“ — ასე ჰქვია ფილმს, რომლის სცენარი აკა მორჩილაძის მოთხრობაზეა დაფუძნებული. მთავარ როლებში ლევან წულაძე, დუტა სხირტლაძე და ქეთი შათირიშვილი არიან. ოპერატორი კი დავით გუჯაბიძეა, რომელიც მერაბ კოკოჩაშვილის განუყრელი „თანამებრძოლია“.
— ბატონო მერაბ, ქართული კონოს მოყვარულნი ბოლო წლების მანძილზე არც ისე განებივრებულნი არიან პრემიერებით, მით უფრო, თქვენ მიერ გადაღებული ახალი კინოშედევრებით. როგორ მოხერხდა ამ პროექტის დაგეგმვა და განხორციელება ამ რთულ პერიოდში?
— ფილმის 60% გადაღებულია, თუმცა, ამ დროისთვის, დასრულებულიც კი გვექნებოდა გადაღებები, კორონავირუსის პანდემიის გამო მძიმე სიტუაციას რომ არ შეეშალა ჩვენთვის ხელი. გადაღების პროცესში იძულებული გავხდით მუშაობა შეგვეწყვიტა. ამას დაემატა ისიც, რომ ჩვენს ფილმში გვაქვს ეპიზოდები, რომელიც ევროპაშია გადასაღები, რისთვისაც ხელშეკრულებით მოწვეული გვყავდა უცხოელი ბიზნესმენი, რომელიც პროექტს ფინანსურად უჭერდა მხარს. პანდემიის გამო მისმა კომპანიამ ფილმისთვის გათვალისწინებული ფინანსური საშუალებები დაკარგა და, სწორედ ამიტომ, უცხოეთის ეპიზოდები გადასაღები დაგვრჩა. მას შემდეგ, რაც ასეთ რთულ სიტუაციაში აღმოვჩნდით, დახმარება კულტურის სამინისტროსგან მივიღეთ. თავიდან ძალიან მცირე თანხა მოგვცეს, რაც ჩვენთვის საჭირო თანხის 1/3 -ს შეადგენდა. ახლა ნელ-ნელა დაიწყეს იმ თანხის გადმოცემა, რაც საშუალებას მოგვცემს — ფილმის დარჩენილი 40% გადავიღოთ. ჩვენი კინოცენტრისა და კულტურის სამინისტროს დაპირების საფუძველზე, ვიმედოვნებთ, რომ გავაგრძელებთ და დავასრულებთ გადაღებებს.
თუ ყველაფერი კარგად იქნება, გადაღებას მოვრჩებით აპრილის თვეში, შემდეგ რამდენიმე თვე დაჭირდება მონტაჟს, გახმოვანებასა და მუსიკალურ გაფორმებას და ჩვენ წლის ბოლოსთვის ფილმი მზად გვექნება.