გვესაუბრება დაავადებათა კონტროლის ცენტრის დირექტორის მოადგილე მეცნიერების დარგში პაატა იმნაძე, რომელიც ასეთ ინფორმაციას გვაწვდის: „დღეს დადასტურებული კოვიდ-შემთხვევების 90 %-ზე მეტი ომიკრონია. ჯერჯერობით, როგორც ჩანს, ომიკრონი აგრესიული არაა. როცა დღეში მაქსიმალური 6500 აქტიური შემთხვევა გვქონდა და ადამიანების საავადმყოფოში დაწვენა ვერ ხერხდებოდა, დღეს უკვე 100 000-მდე შემთხვევა გვაქვს დღეში, მაგრამ საავადმყოფოებში თავისუფალი ადგილები გვრჩება. ამ შედეგზე დაკვირვებით შეგვიძლია ვივარაუდოთ, რომ ომიკრონი უფრო სუსტია. ისეთ ქვეყნებში, სადაც ვაქცინირებულთა მაჩვენებელი მაღალია, ეს ვირუსი უფრო მეტად ემსგავსება გრიპს, რომელიც შეიძლება ვინმეს ძალიან გაურთულდეს, მაგრამ უმეტესობა მარტივად გადაიტანს. თუმცა ჯერ კიდევ არ გვაქვს საკმარისი სამეცნიერო მტკიცებულებები იმის შესახებ, თუ რას ტოვებს ეს ვირუსი და რა იქნება ამ ვირუსის გადატანის შემდგომ“.
კითხვაზე — რეალურია თუ არა პროგნოზი, რომლის თანახმადაც ომიკრონი არის პანდემიის დასასრულის დასაწყისი და იქნება თუ არა 2022 პირბადეების ტარების ბოლო წელი, პაატა იმნაძე გვპასუხობს: „არ მსურს ვარსკვლავთმრიცხველს დავემსგავსო, რადგან კორონას შესახებ ნაადრევი პროგნოზის გაკეთება ძნელია სამეცნიერო მტკიცებულებების გარეშე. საქმე უნდა წავიდეს იმისკენ, რომ ვირუსი გახდეს სეზონური, მოერგოს ადამიანთა პოპულაციას, გავრცელდეს სწრაფად, მაგრამ არ დაღუპოს ადამიანები, რადგან გარდაცვლილი ადამიანისგან ვირუსი ვეღარ მრავლდება. დასუსტებული ვირუსი, წესით და რიგით, ნაკლებად ვირულენტური უნდა იყოს, რაც გვაძლევს საშუალებას — ვივარაუდოთ, რომ ეს წელი იქნება პანდემიის ბოლო წელი“.
ეპიდემიოლოგი აცხადებს, რომ ამ ეტაპზე რთულია იმის თქმა, ზუსტად როდის შემოვა ჩვენს ქვეყანაში კოვიდის სამკურნალო პრეპარატები, მაგრამ გვარწმუნებს, რომ იმ ქვეყნებს შორის, რომლებიც ამ პრეპარატებს მიიღებენ, ერთ-ერთი პირველი ვიქნებით.
დაიწყება თუ არა სწავლა უნივერსიტეტებში მარტის თვიდან? — ამ კითხვაზე პაატა იმნაძე გვპასუხობს: „სკოლებსა და ბაღებში უკვე აღდგა სწავლება, ბავშვებს აქვთ საშუალება — არჩევანი გააკეთონ ონლაინ და აუდიტორიებში სწავლებებს შორის. რაც შეეხება უნივერსიტეტებს, ჩვენი ინფორმაციით, აცრილია პროფესორთა უდიდესი ნაწილი, თუმცა — სტუდენტთა არც ისე დიდი რაოდენობა (თუ არ ჩავთვლით სამედიცინო უნივერსიტეტს). დღეს ვირუსთან ბრძოლის ტაქტიკა შეცვლილია და ძირითადი აქცენტი გაკეთებულია აცრასა და რეგულაციების დაცვაზე. ამიტომ ვფიქრობ, რომ სწავლა უნდა აღდგეს, რამდენადაც ეს შესაძლებელია, რადგან საკითხავია — რა უფრო დამღუპველ შედეგამდე მიგვიყვანს: ომიკრონი თუ გაუნათლებელი თაობა?!“
