„დედაენის დღეს საზოგადოებას კიდევ ერთხელ მინდა შევახსენო, რომ სწორედ, რუსიფიკაციის 200 წლოვანი პოლიტიკის შედეგია, რომ კავკასიურ ენათა აბსოლუტური უმრავლესობა დღეს გაქრობის საფრთხის წინაშეა. ეს, როცა კავკასია თავისი მრავალფეროვნებით ანტიკური დროიდან აკვირვებდა მსოფლიოს და არაბები მას ეძახდნენ ენათა მთას. ეს სიმდიდრეც ჩვენი დასაცავია და ამისთვის მივმართეთ იუნესკოს, რათა კავკასიური ენების დაცვის დღე გამოაცხადოს“, — თქვა პრეზიდენტმა სალომე ზურაბიშვილმა, რომელმაც ქართული ენის დღეს საზოგადოებას სკოლაში არჩევითი მეგრული და სვანური ენების სწავლების შემოღების წინადადებით მიმართა.
პრეზიდენტი დღევანდელ დღეს უძღვნის უკრაინას, რომელიც ომობს რუსეთის წინააღმდეგ.
„45 წლის წინ საბჭოთა წნეხის ქვეშ ქართველმა საზოგადოებამ შეძლო და დაიცვა სახელმწიფო ენა. დღეს უსასტიკეს პირობებში უკრაინა იბრძვის საკუთარი მიწის და სახელმწიფოს გადასარჩენად და იბრძვის საკუთარი ენისთვის, ჩვენ მათ გვერდით ვდგავართ და ვიცით რომ ასეთი მათი შემართებით შეუძლებელსაც შეძლებენ. ამ დღეს ვუძღვნით მათ“, — აღნიშნა სალომე ზურაბიშვილმა.
