გვესაუბრება სემეკის თავმჯდომარე, პროფესორი დავით ნარმანია
— დღეს, როდესაც პოლიტიკა დიდი დოზით მიეწოდება აუდიტორიას და რამდენიმე მედიასაშუალების მიმართ აგრესიაც კი გაჩდა, რას ურჩევთ მედიასაშუალებებს, რამდენად უნდა ვაქციოთ მეცნიერები აზრის ლიდერებად?
— პოლიტიკამ დაღალა ხალხი, თუმცა მედიისთვის მაინც პოლიტიკური კინკლაობა, პოლიტიკური ტალახის სროლა უფრო საინტერესოა, ვიდრე სამეცნიერო მიღწევები. მხოლოდ ცალკეულ ბეჭდურ მედიასაშუალებებსა და სააგენტოებში ვხვდებით მასალებს წარმატებულ ახალგაზრდა სტუდენტებზე, რომლებმაც 100%-იანი გრანტი მოიპოვეს და საზღვარგარეთის წარმატებულ უნივერსიტეტებში ჩააბარეს, ან, უნივერსიტეტის დამთავრების შემდეგ, მსოფლიოს წამყვან კომპანიაში, ორგანიზაციასა თუ დაწესებულებაში დასაქმდნენ. არადა, სწორედ ამგვარი ახალგაზრდების პოპულარიზაცია უნდა მოხდეს, რომ სხვები, მათი თანატოლები, უფრო მეტად დაინტერესდნენ და საქმეზე, სწავლაზე, განვითარებაზე ორიენტირდნენ. პოლიტიკა ცუდი არ არის, არაფერს ვერჩი პოლიტიკოსებს, თუმცა პოლიტიკოსები პოლიტიკოსები უნდა იყვნენ და სხვა ადამიანები პოლიტიკით არ უნდა დაიღალონ.
– მედია ამბობს, რომ ეს არის საზოგადოების დაკვეთა და იმიტომ ვიქცევით ასეო. თქვენი აზრით, არის ეს საზოგადოების დაკვეთა?
— მე მგონი — არა! ბევრი ტელევიზორს არც უყურებს, მათ შორის მეც – პრაქტიკულად აღარ ვუყურებ ტელევიზორს და საინფორმაციო გადაცემებს, რადგან ძალიან მოსაწყენი და არაფრისმთქმელი გახდა. თუ დრო მაქვს, უფრო შემეცნებით და ანალიტიკურ გადაცემებს ვადევნებ თვალს.
