„პარაგრაფ შეკვეთილის“ დონის $ 69 მილიონის ღირებულების სასტუმრო აბასთუმანში შენდება
აბასთუმანში სასტუმრო Autograph Collection-ის მშენებლობა 2023 წელს დასრულდება. საუბარია Marriott International-ის უმაღლესი კატეგორიის ბრენდზე – ამ ინფორმაციას „ბიზნესპარტნიორი“ ავრცელებს, რომელიც თანაინვესტირების ფონდს ესაუბრა. როგორც ფონდში ამბობენ, პროექტის ინვესტიციის ჯამური მოცულობა 69 მლნ დოლარია. სასტუმრო იგივე სეგმენტზეა გათვლილი, რაზეც „პარაგრაფ შეკვეთილი“.
ცნობისთვის, 150 ნომრიან სასტუმროში — Autograph Collection — თავმოყრილი იქნება სპა, აუზი, რესტორანი, საკონფერენციო დარბაზი, ტერასა 360 გრადუსიანი ხედით და ა.შ. წიწვოვანი ტყით გარშემორტყმული სასტუმრო 20 000 კვ.მ. მიწის ნაკვეთზე განთავსდება.
რა ბედი ეწია 2011 წელს ანაკლიის პორტისთვის გამოყოფილ 1.5 მლნ ლარს?
საერთოდ რას უპირებთ ანაკლიის პორტს? – ამ კითხვით მიმართა „ნაციონალური მოძრაობის“ წევრმა, დეპუტატმა ანა წითლიძემ ფინანსთა მინისტრ ლაშა ხუციშვილს პარლამენტში სიტყვით გამოსვლისას.
„თქვენ ხართ საერთაშორისო დავაში ანაკლიის განვითარების კონსორციუმთან ანაკლიის არასწორი პოლიტიკის გამო, რომელიც ბიუჯეტს უჯდება მილიონობით ლარი. მაგრამ თუ ეს დავა საქართველომ წააგო, ინვესტორები ჩვენ გვედავებიან, ასევე, უკვე განხორციელებულ ინვესტიციას, 80 მილიონს და საქართველოს ბიუჯეტს დამატებით ასობით მილიონი ლარის გადახდა მოუწევს.
2021 წელს ბიუჯეტში გათვალისწინებული გქონდათ 1.5 მლნ ლარის დახარჯვა ანაკლიის პორტთან დაკავშირებით. რა ბედი ეწია ამ თანხას? ზუსტად ამდენივე თანხა გაქვთ გათვალისწინებული 2022 წლის ბიუჯეტში და მაინტერესებს — რას უნდა მოხმარდეს ეს თანხა? ასევე, 2021 წელს 10 მილიონი ლარის დახარჯვა იყო დაგეგმილი ავტომაგისტრალის და რკინიგზის პროექტებზე, მაინტერესებს — რა ბედი ეწია ამ თანხას? საერთოდ, რას უპირებთ ანაკლიის პორტს?“ – მიმართა ფინანსთა მინისტრს წითლიძემ.
მინისტრის თქმით, გამოყოფილი თანხა იხარჯება იმისთვის, რომ მოხდეს ახალი პირობებით ტენდერის გამოცხადება, შესაბამისი სამუშაოების დაფინანსება. ამ შემთხვევაში საუბარია მოსამზადებელ სამუშაოებზე, რათა მოხდეს აღნიშნული ტენდერის გამოცხადება.
„რაც შეეხება გზის და რკინიგზის მიყვანას, სრულ პასუხისმგებლობას ვიღებ, რომ როგორც კი პროექტი საწყის ეტაპზე იქნება, თანხებს მოვიძიებთ იმისთვის, რომ ეს ვალდებულებები სახელმწიფოს მხრიდან შესრულდეს. ამ ნაწილში ვერანაირ პრობლემას ვერ ვხედავ. სახელმწიფოს მხრიდან ვალდებულებები შესრულდება იმაზე ადრე, ვიდრე პროექტით ამის საჭიროება დადგება“, – განაცხადა ლაშა ხუციშვილმა.
სასაფლაობის ძარცვის მორიგი ფაქტი ლანჩხუთში
ლანჩხუთში სასაფლაობის გაძარცვის მორიგი ფაქტი დაფიქსირდა. ამჯერად სოფელ ლესაშია საფლავები გაძარცვული.
ადგილობრივთა ინფორმაციით, დაახლოებით, ტონამდე სხვადასხვა სახის ლითონია საფლავებიდან წაღებული. მათივე თქმით, ათამდე საფლავია გაძარცვული და დაზიანებული.
„ჩემი სოფლის სასაფლაოზე ათამდე საფლავი გაძარცვეს რამდენიმე დღის წინ (ლანჩხუთის მუნიციპალიტეტი). ასევე, გაძარცვულია ბებიაჩემის საფლავი (ალუმინის ღობე), რომელიც ყველასთვის საყვარელი ისტორიის მასწავლებელი იყო. მესმის, რომ ადამიანებს უჭირთ, თუმცა, ვერ წარმომიდგენია, რომ ადამიანი, რომელიც პურს ვერ ყიდულობს, ათამდე საფლავს ძარცვავდეს. შესაბამისად, ვინც ეს ჩაიდინა (სავარაუდოდ, ჯგუფმა), ორგანიზებულად მოქმედებდა. სამწუხაროდ, არ მაქვს იმედი, რომ ეს სულმდაბალი, უღირსი ადამიანები შესაბამის სასჯელს მიიღებენ“, — წერს ფეისბუქგვერდზე მიხეილ სარჯველაძე.
წაღებულია საფლავების ღობეები, ალუმინის და სხვა მეტალის კონსტრუქციები, დამტვრეული და გაძარცვულია მთლიანად სასაფლაო.
„ეს ჩემი სოფლის გზაა და ნურავის გაგიკვირდებათ, თუ „ოცნებაზე“ კარგს არაფერს ვიტყვი“
„ეს ჩემი სოფლის გზაა და ნურავის ნუ გაგიკვირდებათ, თუ „ოცნებაზე“ კარგს არაფერს ვიტყვი. ჩემთვის საქართველო იწყება ამ ქუჩიდან და ამ წერტილიდან. მიუხედავად ბევრი დაპირებისა, ეს გზა ისევ ამ დღეშია“, — ამ პოსტს ვიდეოსთან ერთად სოციალურ ქსელში ჩოხატაურის მუნიციპალიტეტის სოფელ შუაფარცხმის მცხოვრები დავით ბერიშვილი ავრცელებს.
როგორც „გურია ნიუსს“ აღნიშნული უბნის მცხოვრებლებმა უთხრეს, ხელისუფლების ყოველი ცვლილებისას თუ მოსახლეობასთან შეხვედრისას საუბარია სოფლის შიდა გზების საგანგაშო მდგომარეობაზე. მათი თქმით, შეხვედრა და საუბარი მუდამ დაპირებით სრულდება, თუმცა, „გზა იმაზე უარეს მდგომარეობაშია, ვიდრე აქამდე იყო“.
„დავიღალეთ ამდენი თხოვნა-მუდარით. ჩვეულებისამებრ, დასჭირდებათ სოფლიდან ხმები, მოვლენ და დაგვპირდებიან — ასე ვიზამთ, ისე ვიზამთო და წავლენ. ჩვენც ვართ იმედიანად. წლები გავიდა ამ დაპირებებში და გზა, რომლის გაკეთებასაც თითქმის მთელი ცხოვრებაა ვითხოვთ, უარეს დღეშია. ფეხით გადაადგილებას ვინღა ამბობს, მანქანითაც ჭირს. ბავშვები ცხოვრობენ, სკოლაში დადიან, სახლიდან სკოლამდე თუ წვიმაა ან ნაწვიმარია, ტალახში ამოსვრილები მიდიან. რა ვქნათ? — გვითხრას ვინმემ. ჩვენ არ ვეკუთვნით ჩოხატაურს?! თუ არ ვეკუთვნით, გვითხრან და გვეცოდინება, რომ არ უნდა ველოდოთ მაგათგან არაფერს“, — ამბობენ „გურია ნიუსთან“ საუბრისას იმ უბნის მცხოვრებლები, რომლის შესახებაც დავით ბერიშვილი წერს.
სოფელ შუაფარცხმის აღნიშნული უბნის მცხოვრებთა პრობლემასთან დაკავშირებით „გურია ნიუსი“ ჩოხატაურის მუნიციპალიტეტის მერს დავით შარაშიძეს ესაუბრა. შარაშიძის თქმით, აღნიშნულ გზასთან დაკავშირებით დაპირება არ გაუცია, თუმცა, მაქსიმალურს გააკეთებს მოსახლეობის დასახმარებლად.
„ჩვენგან ამ გზასთან დაკავშირებით შეპირება არ ყოფილა, მაგრამ მივალ, ვნახავ — რა მდგომარეობაა, შევისწავლი საკითხს და მაქსიმალურს გავაკეთებ, რომ ჩვენი მოსახლეობა კმაყოფილი იყოს“, — გვითხრა დავით შარაშიძემ.
გარემოსთვის მიყენებული ზარალი დაანგარიშდება – ზედამხედველობა მტკვარში ჩაღვრილ ბიტუმზე
გარემოსდაცვითი ზედამხედველობის დეპარტამენტის განცხადებით, მდინარე მტკვარში ჩაღვრილი ბიტუმის შემდეგ სპეციალისტებმა წყლის სინჯები აიღეს. მისი შესწავლის შემდეგ გარემოზე მიყენებული ზარალი დაითვლება.
„ახალციხე-ახალქალაქის გზატკეცილზე თურქეთის მოქალაქის მართვის ქვეშ მყოფი ავტომანქანა გადაბრუნდა, შედეგად ბიტუმი დაიღვარა, რამაც გამოიწვია როგორც მიწის, ისე მდინარის დაბინძურება. დეპარტამენტის სამცხე-ჯავახეთის რეგიონული სამმართველოს ინსპექტორებმა ლაბორატორიული კვლევის მიზნით ადგილზე აიღეს შესაბამისი სინჯები. ლაბორატორიული კვლევის შედეგებზე დაყრდნობით დაანგარიშდება გარემოსათვის მიყენებული ზიანის ოდენობა“, – წერია განცხადებაში.
უწყებისვე განცხადებით, გარემოსდაცვითი ზედამხედველობის დეპარტამენტის თანამშრომლების მიერ შედგა ადმინისტრაციულ სამართალდარღვევის შესახებ ოქმი, საქართველოს ადმინისტრაციულ სამართალდარღვევათა კოდექსის 52-ე მუხლითა (მიწის დაბინძურება, დეგრადაცია ან სხვაგვარი გაუვარგისება) და 58-ე მუხლის პირველი ნაწილით (წყლის ობიექტების დაბინძურება, დანაგვიანება, წყლის ობიექტებში ნარჩენებისა და სხვაგვარი ნაყარის ჩაყრა).
თქვენ ხომ არ გცივათ კაბინეტში ბატონო გიორგი? – ზარი ოზურგეთის მერის მოადგილესთან ყვავილების ბაზრობიდან
„არჩევნები დასრულდა და მას შემდეგ ერთი ადამიანიც კი არ გამოჩენილა და არ უკითხავს — თუ რა მდგომარეობაში ვართ. მიუხედავად იმ დაპირებებისა, რასაც ისინი არჩევნებამდე იძლეოდნენ, მერიიდან ერთი ადამიანიც კი არ მოსულა და არ უკითხავს, ისევ ქუჩაში რატომ ვართ დარჩენილები. ისიც კი არ იკადრეს, რომ შუქი გამოეყვანათ ჩვენთვის და აქ სიბნელეში არ ვმჯდარიყავით“, – ამბობენ „გურიის მოამბესთან“ ოზურგეთში, ფოლკლორის ცენტრის წინ მდებარე ყვავილების ბაზრობაზე მოვაჭრე ქალბატონები.
დაახლოებით 12 ადამიანი, უკვე რამდენიმე წელია, ფაქტობრივად, ღია ცის ქვეშ ვაჭრობს. მათ სახელდახელოდ აქვთ გადახურული ბაზრობა და ზაფხულშიც და ზამთრის სიცივეშიც სწორედ ასეთ პირობებში არიან. გარემოვაჭრეები ჩვენთან იმ დაპირებებს იხსენებდნენ, რასაც პირადად ავთანდილ თალაკვაძე მათ არაერთხელ შეჰპირდა:
„დაახლოებით სამჯერ იყვნენ მოსულები ჩვენთან. ეს ჯერ კიდევ არჩევნებამდე ხდებოდა. გვახსოვს ბატონი თალაკვაძე როგორ დაგვპირდა, რომ როგორც თბილისში თავისუფლების მოედანზე არის ლამაზი შენობა ყვავილებით მოვაჭრეებისთვის, სწორედ ისეთ შენობას გაგიკეთებთ ოზურგეთშიო და ხალხი ამ ინფორმაციის გავრცელების შემდეგ გვირეკავდა და გვილოცავდა. შუქსაც გვპირდებოდნენ, ადამიანურ პირობებსაც გვპირდებოდნენ, მაგრამ უკვე რამდენი ხანია, დღემდე არავის უკითხავს ჩვენი ამბავი“, — იხსენებს ქალბატონი.
ერთ-ერთი გარემოვჭრე იმასაც გვიყვება, თუ რა შედეგი გამოიღო მერის მოადგილესთან — გიორგი ღურჯუმელიძესთან დარეკვამ:
„რამდენიმე დღის წინ, როდესაც ძლიერი ქარი და თოვლი იყო, პირადად დავურეკე გიორგი ღურჯუმელიძეს, მერის მოადგილეს და ტელეფონზე რომ მიპასუხა, ვკითხე — ბატონო გიორგი, თბილად ხომ ზიხართ კაბინეტში-თქო. გაკვირვებულმა მკითხა — ვინ ბრძანდებით ქალბატონოო? ვუთხარი — ერთ-ერთი ყვავილებით გარემოვაჭრე ვარ, რომელსაც თქვენ ყველანაირ სიკეთეს დაჰპირდით. ეს დაგავიწყდათ, მაგრამ, რაც მთავარია, თქვენ ხომ ზიხართ თბილ კაბინეტში? მაშინ თითქოს ძალიან შეწუხდა, მაგრამ იმის შემდეგ რამდენჯერაც ვცადე დაკავშირება, სულ გამორთული აქვს. ეტყობა, არასასურველი ნომერი დაბლოკა. აი, ასეთ სიტუაციაში ვართ“, — გვიყვება გარემოვაჭრე.
გარემოვაჭრეები უკმაყოფილებას გამოთქვამენ იმის გამო, რომ ისინი წინასაარჩევნოდ გამოიყენეს, შემდეგ კი არაადამიანურად ზურგი აქციეს და დაივიწყეს.
ცნობისთვის, ყვავილების ბაზრობაზე დაახლოებით 12 ქალბატონი არის დასაქმებული. ისინი სამ წელზე მეტია, თითქმის შუა ქუჩაში სხედან და მათთვის, მიუხედავად უამრავი დაპირებისა, ჯერ ვერცერთმა ხელისუფლებამ ვერ მოიცალა. ამ ადამიანებისთვის ადამიანური პირობების შექმნაზე, სავარაუდოდ, არც ახალი მერი ფიქრობს.
http://guriismoambe.com/archives/62612
„შინსაქმე ვაქციოთ პროფესიად“ – პროექტის პრეზენტაცია ოზურგეთის საკრებულოში
ოზურგეთის მუნიციპალიტეტის საკრებულოში ქალთა გაძლიერებისა და განვითარების მიმართულებით ახალი პროექტის შესახებ იმსჯელეს. საკრებულოს გენდერული თანასწორობის საბჭოს წინაშე „ქალთა ფონდი საქართველოში“-სა და ევროკავშირის მიერ დაფინანსებული პროექტი – „შინსაქმე ვაქციოთ პროფესიად“ — არასამთავრობო ორგანიზაციის (თანამონაწილეობისა და ჩართულობის ცენტრი) პოექტების მენეჯერმა ნანა სიხარულიძემ წარადგინა. პროექტი მიზნად ისახავს ოზურგეთის მუნიციპალიტეტში მცხოვრები მოწყვლადი ჯგუფის წარმომადგენელი ქალების, მათ შორის, ეთნიკური უმცირესობების თემის ქალთა ეკონომიკური განვითარების კუთხით არსებული საჭიროებების გამოკვლევას, მათი უნარების გაძლიერებას და სამოქალაქო ინტეგრაციის ხელშეწყობას. შეხვედრას ესწრებოდნენ პროექტის ბენეფიციარი ქალბატონებიც, რომლებიც, ამ ეტაპზე, უკვე მისდევენ შინსაქმეს და, შესაბამისად, აქვთ სურვილი და მოტივაცია, რომ მათი საქმე უფრო მეტი ეკონომიკური სარგებლობის მომტანი გახდეს მათი ოჯახებისთვის. ოზურგეთის საკრებულოსა და არასამთავრობო ორგანიზაცია „თანამონაწილეობისა და ჩართულობის ცენტრ სიპისის“ შორის გაფორმდა ურთიერთთანამშრომლობის მემორანდუმი.
http://guriismoambe.com/archives/62612
ოზურგეთის „მერცხალის“ მთავარ მწვრთნელად დავით სურგულაძე ინიშნება
როგორც „გურიის მოამბისთვის“ ექსკლუზიურად ხდება ცნობილი, ოზურგეთის „მერცხალის“ მთავარ მწვრთნელად დავით სურგულაძე ინიშნება. ჩვენთვის მოწოდებული ინფორმაციით, აღნიშნულ პოსტზე სურგულაძის დანიშვნა უკვე გადაწყვეტილია. როგორც ჩვენთან სატელეფონო საუბარში თავად ბატონი დავითი აცხადებს, მასთან აღნიშნულ საკითხზე საუბარი ნამდვილად შედგა, თუმცა გადაწყვეტილება ჯერ არ მიუღია და ფიქრისთვის რამდენიმე დღე სჭირდება. ცნობისთვის, 36 წლის დავით სურგულაძე ყოფილი ფეხბურთელია, ის ამჟამად კლუბ „მერცხალში“ 12-13 წლის ბავშვებთან მუშაობს.
