„ამ ქვეყანაში პოლარიზების შემომტანი, დამწყები და მასტიმულირებელი ძალა „ქართული ოცნება“ არ არის. „ქართული ოცნება“ დღეს რეაგირებს იმ სიტუაციაზე, რომელიც ქვეყანაშია. მე, პირადადაც, ამ არჩევნებში „ქართული ოცნების“ მხარდამჭერი იმიტომ ვიყავი, რომ ჩვენ არ უნდა გავიმეოროთ ის შეცდომა, რომელსაც უკვე ოთხი არჩევნებია ვიმეორებთ. მგონია, რომ ადამიანები, რომლებიც ვთანხმდებით — თუ რა არ მოგვწონს, შემდეგ იმაზეც მარტივად შევთანხმდებით — რა მოგვეწონება სამომავლოდ. ეს უკვე 4-ჯერ გავიარეთ. ამიტომ, ვფიქრობ, რომ „ქართულ ოცნებას“ პოზიციები ჯერ არ უნდა დაეთმო, რადგან ცვლილებებისათვის ეს ქვეყანა, ამ ეტაპზე, მზად არ არის. ჯერ არ დამდგარა ისეთი კოალიციის შექმნის დრო, რომელიც „ნაციონალური მოძრაობის“ ირგვლივ აღმოცენდება და შეავიწროებს „ქართულ ოცნებას“. „ოცნებამ“ მაშინ უნდა დათმოს თავისი არეალი, როდესაც ქვეყანა ცვლილებებისათვის მზად იქნება. თუ არაფერი შეიცვალა, 2024 წელში „ქართული ოცნება“ გაცილებით უფრო გაძლიერდება და მაშინაც ყველაფერი ისე იქნება, როგორც ახლა“, — განაცხადა არასამთავრობო ორგანიზაცია — „პოლიტიკური არჩევანის“ დამფუძნებელმა რომან კაკულიამ ტვ პირველის ეთერში.
რომან კაკულია თვლის, რომ ჩვენ ყველაზე მეტი იმაზე უნდა ვისაუბროთ — რატომ არის დღეს ასეთი სიტუაცია, რატომ არის დღეს შეუქცევადი ამ ქვეყნის განვითარება. „ამ ქვეყანაში მცხოვრებ ადამიანებს არ გვაქვს კონსენსუსი იმასთან დაკავშირებით — თუ როგორი ქვეყანა გვინდა. ჩვენ არ ვართ ერთად თანაცხოვრების წესზე შეთანხმებული! იმ ქვეყანაში, სადაც ოპოზიციისგან მთავარი მოსალოდნელი აქტი არის შურისძიება, ძალოვანი სტრუქტურები ვერ გახდება აბსოლუტურად თავისუფალი. როგორც არ უნდა ვისაუბროთ დღეს არსებულ სიტუაციაზე, იმ ადამიანებს, რომლებიც აღარ არიან „ქართული ოცნების“ მხარდამჭერები, მაინც არ სურთ „ნაციონალური მოძრაობის“ შურისძიება „ქართულ ოცნებაზე“. მიუხედავად იმისა, რა დონის პრეტენზიებიც არ უნდა გვქონდეს „ქართული ოცნების“ მიმართ“, — აცხადებს რომან კაკულია.
