გვესაუბრება კონფლიქტოლოგი, ექსპერტი ვალერი ჩეჩელაშვილი
„ახლა არის საუბარი იმაზე, ამ ომის შედეგად, რომელიც გააჩაღა რუსეთმა სუვერენული ქვეყნის წინააღმდეგ, რა საერთაშორისო უსაფრთხოების სისტემა ჩამოყალიბდება. აქ შეიძლება იყოს ოპტიმისტური სცენარი — გაერთიანებული სამყარო რუსეთს დაამარცხებს და, შესაბამისად, ეს გამოიწვევს სერიოზულ ტექტონიკურ ძვრებს საკუთრივ რუსულ საზოგადოებაში და მეორე — ჩვენი გაწევრიანება ნატოსა და ევროკავშირში გაცილებით რეალისტური შეიძლება გახდეს. თუ ეს პროცესები წავიდა უკიდურესად ნეგატიური სცენარით და დასავლეთმა ვერ განახორციელა რუსეთის შეკავება, მაშინ ეს სერიოზულად შეაფერხებს, თუ საერთოდ კითხვის ნიშნის ქვეშაც არ დააყენებს, ჩვენს მიღებას ევროატლანტიკურ სივრცეში“, — აღნიშნავს ექსპერტი ვალერი ჩეჩელაშვილი და პასუხს გვცემს კითხვაზე: — რუსეთის უკრაინაში შეჭრა რამდენად არის მიმართული იმისკენ, რომ უკრაინის მაგალითზე საქართველოს უარი ათქმევინონ ნატო-ში გაწევრიანებაზე?
თუ როგორი უნდა იყოს საქართველოს პოზიცია შექმნილ ვითარებაში — უნდა შეგვეშინდეს თუ მეტი სიმამაცე და თავგანწირვა უნდა გამოვიჩინოთ, ვალერი ჩეჩელაშვილი გვპასუხობს: „აქ არის საუბარი ფასეულობებსა და პრინციპებზე. ჩვენ თუ თანმიმდევრულად ჩვენს პოლიტიკას ვაყალიბებთ ფასეულობების საფუძველზე, რომელზეც ჩვენ 30 წელიწადია ვსაუბრობთ, მაშინ ჩვენ ყოველგვარი ყოყმანის გარეშე უნდა დავდგეთ უკრაინის მხარეს, რადგან ეს არ არის მხოლოდ უკრაინის ხმა, ეს არის მთლიანად თავისუფალი სამყარო და მისი ინტერესები. ამის თაობაზე პირდაპირ განაცხადა პრეზიდენტმა ბაიდენმა. თუ ჩვენ ეს არჩევანი არ გვიღირს გარკვეულ მსხვერპლად, მაშინ, კი ბატონო, შეგვიძლია სხვა გადაწყვეტილებაც მივიღოთ… მაგრამ მე ვთვლი, რომ ამ 30 წლის განმავლობაში განხორციელებული ძალიან მნიშვნელოვანი ძვრები ჩვენს საზოგადოებაში და ჩვენი მისწრაფებები არის ღირსი იმისა, რომ ჩვენ ბოლომდე მივიყვანოთ ჩვენი მიზნები. ჩვენ ბოლომდე უნდა ვიბრძოლოთ, რათა გავხდეთ ევროატლანტიკური სივრცის განუყოფელი ნაწილი და, შესაბამისად, თავისუფალი სამყაროს წევრი“, — განაცხადა ვალერი ჩეჩელაშვილმა.
მოამზადა ნინი თურმანიძემ
