ის, რომ ვლადიმერ პუტინის მიერ უკრაინის ტერიტორიაზე შეჭრას მსოფლიო უყურადღებოდ არ დატოვებდა, ალბათ თავად რუსეთის პრეზიდენტმაც იცოდა. თუმცა, 5 დღის წინ რთული წარმოსადგენი იქნებოდა, რომ საერთაშორისო საზოგადოება პუტინს კულტურის, ვაჭრობისა თუ სპორტის სფეროებიდან ასე გარიყავდა. რა უჯდება რუსეთის ფედერაციას უკრაინაში სამხედრო მოქმედებების გაგრძელება?
შვეიცარიაში, ლუცერნის მუსიკის ფესტივალმა ორი სიმფონიური კონცერტი გააუქმა, რომელთა დირიჟორიც ვალერი გერგიევი უნდა ყოფილიყო.
გერგიევთან ურთიერთობა გაწყვიტა ლუცერნის ორკესტრმა, კარნეგი ჰოლმა, ლა სკალამდა ახლა უკვე მიუნხენის ფილარმონიის ორკესტრმაც. ეს ყველაფერი კი იმიტომ ხდება, რომ გერგიევი პუტინის ცნობილი მხარდამჭერია, უკრაინაში მიმდინარე მოვლენების უარყოფითად შეფასებაზე კი უარს ამბობს.
რუსეთი მონაწილეობას ვერ მიიღებს 2022 ევროვიზიის სიმღერის კონკურსში. „ფორმულა 1 გრან პრი“, რომელიც სოჭში სექტემბრისთის იყო დაგეგმილი, რუსეთში აღარ ჩატარდება. ჩემპიონთა ლიგის ფინალური თამაში, რომელიც პეტერბურგში უნდა გამართულიყო, ახლა უკვე პარიზში გაიმართება. ქვეყანა ვეღარც „ფიფას“ და „უეფას“ ჩემპიონატებში მიიღებს მონაწილეობას.
ორშაბათს საბერძნეთმა განაცხადა, რომ რუსეთის კულტურულ ორგანიზაციებთან ყოველგვარ თანამშრომლობას წყვეტს. ახლახანს ცნობილი გახდა, რომ ჰოლივუდი ახალ ფილმებს რუსეთის კინო-თეატრებში აღარ გაუშვებს. ნიუ-იორკში მეტროპოლიტენის ოპერის თეატრმა გაავრცელა განცხადება, რომ აღარ იმუშავებს იმ შემსრულებლებთან და ინსიტიტუტებთან, რომლებიც პუტინს მხარს უჭერენ ან რომელთაც თავად პუტინი უმაგრებს ზურგს.
„ნიუ იორკ თაიმსი“ წერს, რომ ცივი ომის დღეების შემდეგ რუსეთისა და რუსი ხალხისთვის ამდენი კარი ერთდროულად არ დაუკეტავთ.
და, რომ არაფერი ვთქვათ, რუსეთის წინააღმდეგ შემოღებულ ეკონომიკურ სანქციებზე, რუსული რუბლი ყველა დროის ყველაზე დაბალ ნიშნულზეა. რუსეთის მოქალაქეები ცდილობენ, ბანკომატებიდან თანხა გამოიტანონ, სადაც მათ უზარმაზარ რიგებში უწევთ დგომა. გერმანიის კანცლერმა ოლაფ შოლცმა განაცხადა, რომ შესაძლოა მომდევნო დღეებში ვითარება კიდევ უფრო დაიძაბოს.
„მოდით ნუ ვიკამათებთ, რომ ჩვენ ერთ ღამეში შევცვლით მოვლენებს, მაგრამ რუსეთის ხელისუფლება ძალიან მალე იგრძნობს ეკონომიკურ ტკივილს. გასულ კვირას რუსეთის საფონდო ბირჟა 30%-ით დაეცა, რაც ცხადჰყოფს, რომ ჩვენი სანქციები მუშაობს და ჩვენ ვიტოვებთ დამატებითი სანქციების დაწესების უფლებას“, – აცხადებს გერმანიის ახლად არჩეული კანცლერი ოლაფ შოლცი.
რუსეთის წინააღმდეგ დაწესებული სანქციები მოიცავს ქვეყნის Swift-ის სისტემიდან გამოთიშვასაც, რაც შეუძლებელს გახდის სანქცირებული რუსული ბანკებიდან საერთაშორსო გადარიცხვების წარმოებას. სანქციები დაუწესეს რამდენიმე ფიზიკურ პირსაც, მათ შორის, ვლადიმერ პუტინს და რუსეთის საგარეო საქმეთა მინისტრს სერგეი ლავროვსაც.
ჯერჯერობით უცნობია, თუ როგორი რეაქცია მოჰყვება ამ ზომებს თავად პუტინის მხრიდან. მსოფლიოს ასეთი რეაგირება, შესაძლოა, პუტინის ხელში იარაღად იქცეს, რომელსაც რუსეთის პრეზიდენტი ქვეყნის დასავლეთის პოლიტიკის მსხვერპლად წარმოსაჩენად გამოიყენებს. თუმცა დასავლეთის ასეთმა ერთიანობამ და რუსეთის ცივილიზებული სამყაროსგან იზოლაციამ, შესაძლოა, რუსეთში უფრო გადამწყვეტი საპროტესტო ტალღაც ააგოროს და პუტინის რეჟიმი შიგნიდან დაასუსტოს.
სტატიაზე იმუშავა ლუკა ჯინჭარაძემ
