საფრანგეთის საპრეზიდენტო არჩევნების მეორე ტურში მაკრონსა და
ლე პენს შორის ბრძოლა გაცილებით თანაბარი იქნება
10 აპრილს გამართულ საფრანგეთის საპრეზიდენტო არჩევნებს მეორე ტური მოჰყვება. ისევე, როგორც 2017 წელს, წლევანდელ საპრეზიდენტო არჩევნებში ერთმანეთს პროევროპული, ეკონომიკურად ლიბერალური ემანუელ მაკრონი და ნაციონალისტი ევროსკეპტიკოსი მარინ ლე პენი დაუპირისპირდებიან.
საფრანგეთის შინაგან საქმეთა სამინისტროს მონაცემებმა აჩვენა, რომ ხმების 97%-ის დათვლით მაკრონმა ამომრჩეველთა 27,60%-ის მხარდაჭერა მიიღო. ლე პენმა ხმების 23,41%, ხოლო მემარცხენე კანდიდატმა ჟან-ლუკ მელენ შონმა კი 21,95% მიიღეს.
ხუთი წლის წინ მაკრონმა ლე პენი მეორე ტურში ხმების 66%-ით დაამარცხა, თუმცა, გამოკითხვების თანახმად, ამჯერად ბრძოლა გაცილებით თანაბარი იქნება. ერთ-ერთი გამოკითხვის თანახმად, მაკრონი გაიმარჯვებს ხმების მხოლოდ 51%-ით, ლე პენს კი ამომრჩევლის 49% დაუჭერს მხარს.
პოლიტიკური ანალიტიკოსი ალენ დუჰამელი ვარაუდობს, რომ საპრეზიდენტო არჩევნების მეორე ტურში, ბოლო 50 წლის განმავლობაში, ყველაზე ახლო შედეგები იქნება.
მაკრონმა კვირა საღამოსთავის გახარებულ მხარდამჭერებს სიტყვით მიმართა და მოსახლეობას პოლიტიკური ერთიანობის დიდი მოძრაობის გარშემო გაერთიანებისკენ მოუწოდა.
„მე მინდა საფრანგეთი ძლიერ ევროპაში და არა საფრანგეთი, რომელსაც ევროპის გარეთ მხოლოდ პოპულისტებისა და ქსენოფობების საერთაშორისო ჯგუფი ეყოლება მოკავშირეებად… როდესაც რადიკალი მემარჯვენეები თავისი ყველა გამოვლინებით ქვეყანაში ასეთ სიმაღლეებს აღწევენ, შეუძლებელია ვიფიქროთ, რომ ყველაფერი კარგად მიდის“, — განაცხადა მაკრონმა.
„Marine, President!” და „ჩვენ გავიმარჯვებთ!” — ეს სიტყვები მაშინ გაისმა, როდესაც მარინ ლე პენი სცენაზე გამოჩნა და თავის ამომრჩევლებს მიმართა: „მე აღვადგენ საფრანგეთის სუვერენიტეტს ყველა სფეროში — ფრანგების უნარს, თავად გადაწყვიტონ — დაიცვან თავიანთი ინტერესები… მე გავაკონტროლებ იმიგრაციას და აღვადგენ უსაფრთხოებას ყველასთვის“, — განაცხადა ლე პენმა.
მემარჯვენე კანდიდატმა ფრანგი ამომრჩევლის იმ ნაწილს მიმართა, რომელმაც პირველ ტურში ხმა ემანუელ მაკრონს არ მისცა და მათ საკუთარი პარტიისთვის მხარდაჭრისკენ მოუწოდა.
„24 აპრილს სასწორზე საზოგადოების, ცივილიზაციის არჩევანია, რომელიც მომდევნო 50 წლის ბედს გადაწყვეტს”, — განაცხადა ლე პენმა.
როგორც გამოცემა „ტელეგრაფი„ წერს, მემარცხენე ამომრჩევლების ხმები არჩევნების შედეგის განსაზღვრაში გადამწყვეტი იქნება.
პირველ ტურში მესამე ადგილზე გასულმა კანდიდატმა მელენ შონმა მხარდამჭერებს განუცხადა, რომ მეორე ტურში ლეპენს ხმა არ უნდა მისცენ, მაგრამ მაკრონს მხარი ღიად არ დაუჭირა.
„ჩვენ ვიცით, ვის არ მივცემთ ხმას… არც ერთი ხმა არ უნდა მიიღოს ქალბატონმა ლე პენმა“, — თქვა მელენ შონმა.
გამოკითხვები აჩვენებს, რომ მელენ შონის ამომრჩევლის მეხუთედმა შესაძლოა ხმა მარინ ლე პენს მისცეს.
საპრეზიდენტო არჩევნებში მონაწილეობას იღებდა ანტი-ისლამისტი და იმიგრაციის მოწინააღმდეგე კანდიდატი ერიკ ზემოური, რომელმაც თავისი კამპანიის განსაცვიფრებელი დასაწყისი არჩევნებში წარმატებად ვერ გადააქცია. ანალიტიკოსები ამბობენ, რომ მისმა მკაცრმა პოზიციებმა დიდი როლი ითამაშა ლე პენის იმიჯის შერბილებაში. ზემურმა ამომრჩევლებს მოუწოდა ხმა მისცენ მარინ ლე პენს.
ამომრჩეველთა დაბალი აქტივობა
გამოკითხვების მიხედვით, არჩევნებზე აქტივობამ 74% შეადგინა, რაც 2017 წლის საპრეზიდენტო არჩევნების მონაცემებზე დაბალი მაჩვენებელია და მხოლოდ მცირედით აღემატება რეკორდულად დაბალ აქტივობას, 73%-ს, რაც 2002 წლის არჩევნების პირველ ტურში დაფიქსირდა. ამ არჩევნებში ლე პენის მამამ, ჟან-მარიმ მისი სოციალისტი მეტოქე დაამარცხა.
სულ რაღაც ერთი თვის წინ, მაკრონს აშკარა უპირატესობა ჰქონდა, გამოიყენა რა უკრაინაში ომის „დროშის გარშემო შეკრების“ ეფექტი.
მაგრამ დიპლომატიურ ფრონტზე წარუმატებლობამ, ასევე წინასაარჩევნო კამპანიაში მისმა გვიან ჩართვამ ბევრი ფრანგის უკმაყოფილება გამოიწვია. მაკრონის მხარდამჭერთა ნაწილი ახლა ამბობს, რომ პრეზიდენტს საშინაო პრობლემები ნაკლებად აინტერესებს, მიუხედავად მრავალი დაპირებისა, რომ ენერგეტიკისა და საწვავის ფასების ზრდას შეაჩერებდა. მეორეს მხრივ, ლე პენი, როგორც ჩანს, ბოლო დღეებია სტიმულს იძენს..
ბოლო დღეებში ჩატარებული გამოკითხვები აჩვენებს, რომ ამჯერად რბოლა გაცილებით დაძაბული იქნება. ნათელია, რომ მაკრონს უპირატესობა აქვს, მაგრამ რამდენიმე გამოკითხვა „შეცდომის ზღვარზეა“.
2017 წლის საპრეზიდენტო არჩევნების მეორე ტურის ბოლო შეტაკების განმსაზღვრელი მომენტი სატელევიზიო დებატები იყო, რომელშიც მაკრონმა აშკარად გაიმარჯვა. ლე პენის ბანაკი ამტკიცებს, რომ მემარჯვენე კანდიდატი ბევრად უკეთ არის მომზადებული 20 აპრილის სატელევიზიო დუელისთვის, ვიდრე 2017 წელს იყო.
ნიკოლას მეისონეტმა, დეპუტატმა, თქვა: „ახლა ის მზად არის. ამის დანახვა შეგიძლიათ მის ქცევაში. ვფიქრობ, ფრანგები გაოცდებიან; ვფიქრობ, მას კარგი დებატები ექნება და ეს მას გამარჯვებამდე მიიყვანს“.
