რაოდენ გასაკვირიც არ უნდა იყოს, ვირტუალური სამყარო ემოციების გამოხატვის ყველაზე სანდო სივრცედ იქცა. საზოგადოებრივი აზრის ფორმირებამ, ზოგჯერ კი, მწვავე დაპირისპირებამაც კი, დიდი ხანია, თავშეყრის ადგილებიდან სოციალურ ქსელებში გადაინაცვლა. რიგითი მოქალაქის, ყოფილი პოლიტიკოსის, ეროვნული მოძრაობის მონაწილის, ბიზნესმენის, ხელოვანისა თუ მწერლის საინტერესო მოსაზრებები, ხშირად, ისეთ ემოციას იწვევს, როგორც კარგი ლიტერატურული ნაწარმოები. ამას მხოლოდ ერთი მიზეზი შეიძლება ჰქონდეს — განცდილი მოვლენების გულწრფელად გადმოცემას ყოველთვის თავისი ხიბლი აქვს.
ბოლო დღეებში სოციალურ ქსელებში უკრაინაში მოსალოდნელი ომის თემა დომინირებდა. ჩვენი ყურადღება რამდენიმე მოსაზრებამ მიიქცია:
მწუხარებასთან ერთად, ჩვენ განვიცდით სირცხვილს
დიმიტრი მურატოვი, ნობელის პრემიის ლაურეატი მშვიდობის დარგში, „ნოვაია გაზეტას“ მთავარი რედაქტორი: — დღეს, ყველანი დილით ადრე შევიკრიბეთ რედაქციაში. უბედურება გვჭირს. ჩვენმა ქვეყანამ, პრეზიდენტ პუტინის ბრძანებით, დაიწყო ომი უკრაინასთან. და არავინ არის, ვინც ამ ომს შეაჩერებს. ამიტომ, მწუხარებასთან ერთად, ჩვენ განვიცდით სირცხვილს. მთავარსარდალი ხელში ატრიალებს „ბირთვულ ღილაკს“, როგორც ძვირადღირებული მანქანის „ბრელოკს“. შემდეგი ნაბიჯი არ იქნება ბირთვული თავდასხმა? ვლადიმერ პუტინის სიტყვებს შურისძიების იარაღზე სხვაგვარად ვერ ავხსნი. „ნოვაია გაზეტას” შემდეგ ნომერს ორ ენაზე — უკრაინულ და რუსულ ენაზე გამოვცემთ. იმიტომ რომ, ჩვენ არ ვაღიარებთ უკრაინას მტრად და უკრაინულ ენას მტრის ენად. დაბოლოს, მხოლოდ გლობალურ ანტი-ომის მოძრაობას შეუძლია სიცოცხლის გადარჩენა ამ პლანეტაზე“.
შეუძლებელია, ეს ბავშვები და ბოროტება ერთდროულად არსებობდნენ სამყაროში
გია მურღულია: — ახლა გაკვეთილი მაქვს. ჩემი ბავშვები სხედან კლასში და მიყურებენ. ეს გონიერი, ფიქრიანი, კეთილი და ნათელი მზერაა, რომელიც კაცობრიობას უფლებას არ აძლევს — უზნეო და მოძალადე იყოს. შეუძლებელია, ეს ბავშვები და ბოროტება ერთდროულად არსებობდნენ სამყაროში. ვუყურებ მათ, რაღაცას ვუხსნი და თან ვფიქრობ, რომ მათი მშვენიერი თვალების წინაშე მინდა უკეთესი გავხდე, ვიდრე დღეს ვარ. მასწავლებლის მისიაა — ეს აზრი და განწყობა დაანახვოს და გადასცეს მსოფლიოს.
ჯონი თაყნიაშვილი: ის რაც ეხლა უკრაინისთვის დიდი ტრაგედიაა, რუსეთისთვის გახდება კატასტროფა!
— პუტინი წერს იმ გეოპოლიტიკური გაუგებრობის ბოლო ისტორიას, რასაც რუსეთის ფედერაცია ჰქვია! რა მსოფლიო ომი, რის მსოფლიო ომი? ეს არის რუსული ომი, რომელიც რუსეთის დაშლით უნდა დამთავრდეს!
რუსის მოქმედება იმ შაჰიდი ტერორისტის მოქმედებას ჰგავს, რომელსაც გამომწყვდეული ჰყავს მძევლები და მოთხოვნების შეუსრულებლობის შემთხვევაში აფეთქებით იმუქრება… ერთგან თუ გაუვიდა, დომინოს თეორიით გარშემო ყველას დააწვენს… მაქსიმ გორკი — „რუსი ხალხის წარმატების ყველაზე მნიშვნელოვანი ნიშანი მათი სადისტური სისასტიკეა.“„Наиважнейшею приметою удачи русского народа есть его садистская жестокость“ — Максим Горкий.
ღია წერილი ჯოზეფ ბაიდენს/გავშალე თუ არა სოცქსელი, ბაიდენმაო — ეს პირველი ტრანშია რუსებზე ახალი სანქციებისა და მეორესაც უკვე ვამზადებთო, გზაში დავაწევო. შენი საქმისა შენ იცი, ბატონო, მაგრამ რეიგანისა არ იყოს, მგონი შენც სულ დაგავიწყდა ქართული ანდაზები, განსაკუთრებით ისა: — ომში რა სჯობიაო და — რაც ხელში მოგხვდებაო… სანქციებს რაც შეეხება, თავადაც გაეცნობა მკითხველი. ეხლა მე სხვა რამე მინდა გაგახსენოთ.
მისტერ ბაიდენ,
თქვენმა დიდმა წინაპარმა, ასევე დემოკრატმა ტრუმენმა — როდესაც 1952-ში საოკუპაციოდ მიადგნენ რუსები საბერძნეთსა და თურქეთსა — „მოდით, ჯერ შეიჭრნენ კომუნისტები და მერე გავუმკაცრებ მაგათ სანქციებსო“ — ეგრე კი არა ჰქნა? პირდაპირ მიიღო ნატოში თურქეთიც და საბერძნეთიც. მგონი თვითონაც რომ არ უნდოდათ.
ჩრდილოეთ კორეა როცა მიაწვა სამხრეთ კორეას 1950-ში, თან ჩინელებსაც რომ იხმარდა, თვალიც კი არ დაუხამხამებია, ისე მიუშვა იმ თვალებდახამხამებულებისთვის ამერიკული ჯარები და სამხრეთელები გადაარჩინა ტოტალიტარიზმს.
სხვათა შორის, ამერიკელი ჯარისკაცების მსხვერპლი დიდი არ უნდა იყოსო და არც ატომური ბომბის გამოყენებას მოერიდა იაპონიაში. ამით ტურასავით რომ ისარგებლა რუსების სტალინმა და უკვე კაპიტულაციისთვის გამზადებულ ქვეყანას — ეგება რაღაცა წავღლიტოო — ომი გამოუცხადა.
სანქციები თუ გინდა კიდე, ეგეც ტრუმენას მოგონილია — არ დავინახო ევროპამ რამე იყიდოს საბჭოელებისგანო. მაგათ 12 დოლარიან ნახშირს ამერიკული 20 დოლარიანი გერჩივნოთო.
მარშალის გეგმაო — ეხლა რომ ქებით ლაპარაკობენ და მაგან ააყვავა ევროპაო, მთავარი მანდ კრედიტები კი არ იყო, მთავარი იმ იდეოლოგების გამოძევება და მოშორება იყო, რუსებს რომ ეჯდა ევროპულ მთავრობებში…
მოკლედ, მე ჩემი გითხარი და ბოლოს ერთ ქართულ ანდაზასაც გაგახსენებ, თუ დაგავიწყდა: — ნაქებმა კატამ თაგვი ვერ დაიჭირაო…
დავით ზარდიაშვილი: პუტინის დღევანდელი ბანდიტური პარპაში უკრაინაში 2008 წელს საქართველოს წინააღმდეგ დაუსჯელად ჩადენილის ლოგიკური გაგრძელებაა
— ეს არის ტიპიურად ველური, შეშლილი რუსული ბუნტი, ზოგადად — ცივილურობის წინააღმდეგ. არსებობს ბირთვული აპოკალიფსის, მართალია, არც თუ მაღალი, მაგრამ სრულიად რეალური საფრთხე. თუ უფლის ნებით მსოფლიო გადარჩა და დარწმუნებული ვარ, ასეც იქნება, მაშინ ძალიან მალე ყველანი აშკარად დავინახავთ: რუსეთი წერას ჰყავს ატანილი და საკუთარი შეშლილობით გარდაუვლად იქითკენ მიდის, რომ მისი ბოროტი ე.წ. სახელმწიფოებრიობა, სინამდვილეში კი — „ოქროს ურდოს“ ყაიდის ყოვლად უსჯულო პოლიტიკური კავშირი, როგორც აბსოლუტურად შეუთავსებელი რაიმე საერთაშორისო თუ შიდა წესრიგთან, საერთოდაც აღიგავოს პირისაგან მიწისა!
ღმერთო, შენ გვიშველე!
რა მოხდა და პუტინმა მთელ მსოფლიოს გვითხრა: თქვენ თავზეც გავიარეო! და რა ქნა ამ დროს მსოფლიოში ყველაზე მეტი ძალაუფლებით აღჭურვილმა კაცმა — აშშ-ს პრეზიდენტმა მის შესაჩერებლად? აი რა: ბაიდენი ადგა და დაადო! დიახ. დაადო… მკაცრი ეკონომიკური სანქციები ლუგანსკსა და დონეცკს (?!!). მართლაც გამაოგნებელია, რადგან უკრაინაში განვითარებული გეოპოლიტიკური ტრილერი საბოლოოდ იღებს შიზო-პოლიტიკის ანუ „შიზოტიკის“ სახეს. ჰიჩკოკის „ფსიქო“ მიმიქარავს! შეიძლება დაბეჯითებით ითქვას: ე.წ. მსოფლიო წესრიგი თავისი ე.წ. უსაფრთხოების სისტემებით — შიზოიდურია. რა შეიძლება მოხდეს — არავინ იცის. ყველა დარწმუნებულია — უარესი გველის.
სააკაშვილისა და ნაცების წრეგადასული უტიფრობა, თითქოსდა პუტინის დღევანდელი ბოროტმოქმედება უკრაინაში აგვისტოს ომში ჩადენილ მათ ღალატს „ჩამოწერს,“ ისტორიული სიმართლის, სამართლისა და სამართლიანობის მთლიანად აბუჩად აგდებაა!
რასაკვირველია, პუტინის დღევანდელი ბანდიტური პარპაში უკრაინაში 2008 წელს საქართველოს წინააღმდეგ დაუსჯელად ჩადენილის ლოგიკური გაგრძელებაა: საერთაშორისო სამართლისა და მსოფლიო წესრიგის დასანგრევად, მთელი ცივილიზაციისა და კონკრეტულ სუვერენულ ერი-სახელმწიფოთა წინააღმდეგ მიმართული უსასტიკესი, განგრძობადი საერთაშორისო ბოროტმოქმედებაა. მაგრამ ამ განგრძობადი ბოროტმოქმედების სათავე, მოვლენათა განვითარების ის ჯაჭვი, რაც 2008 წლიდან შეიკრა, სააკაშვილის მოღალატეობასთან, მის გამცემლობასთან ასევე პირდაპირ და უშუალოდ არის დაკავშირებული!
განსხვავებით დღევანდელი ვითარებისგან, სრულიად სხვა საერთაშორისო მდგომარეობა გახლდათ 2008 წელს; დღეს დაუსჯელობით თავგასულ პუტინს ცა ქუდად აღარ მიაჩნია და დედამიწა ქალამნად, სუვერენულ ქვეყანაზე ბანდიტური თავდასხმისათვის არც რაიმე ფორმალური საბაბი, ანდა „გაპრავება“, გარდა იმისა, რომ თურმე რუსის „ძალა აღმართსა ხნავს“, აღარა სჭირდება; სწორედ „ძალის არგუმენტს“, ე.ი. ოდენ ძალით მითვისებულ „უფლებას“ ეყრდნობა, როცა ამ ბრუტალური ძალის დემონსტრირებას ახდენს მსოფლიოს დასაშანტაჟებლად, რათა გამოგლიჯოს ის, რაც, საცა ღმერთი და ოდნავი სამართალია, არ ეკუთვნის და არც არასდროს შეიძლება ეკუთვნოდეს!
მაგრამ: 2008 წელს პუტინს ძალის დემონსტრირებისათვის აუცილებლად ფორმალური საბაბიცა სჭირდებოდა და თავისი აგრესიის „გაპრავებაც“. სწორედ ეს როლი შეუსრულა სააკაშვილმა — როცა ცხინვალის რეგიონის კონფლიქტის ზონაში, სადაც საქართველოს მიერ ნაკისრი საერთაშორისო ვალდებულებებით იკრძალებოდა დამატებით ერთი ჯარისკაცის შეყვანაც კი, არმიის გამოყენებისა და საბრძოლო მოქმედებების დაწყების უკანონო, ანტი-კონსტიტუციური და ანტი-სამართლებრივი ბრძანება გასცა; სააკაშვილმა და პუტინმა, როგორც თანაოკუპანტებმა, მაშინ ერთობლივად ჩაიდინეს საარაკო უსჯულოება სამართლისა და სამართლიანობის, ჩვენი ქვეყნისა და, როგორც დღეს აშკარად გამოჩნდა, მთლიანად ცივილიზაციის წინააღმდეგ; სწორედ ეს, საქართველოს წინააღმდეგ ჩადენილი ბოროტმოქმედება გახდა ის საბედისწერო კარიბჭე, რამაც პუტინს გზა გაუხსნა შემდგომი გლობალური აგრესიისკენ და როცა ეს, „კავკასიონის კარი“ გადმოიარა, იგი საბოლოოდ შეუკავებელი გახდა მთელ მსოფლიოში.
სააკაშვილის „ისტორიული მისია“ თურმე ეს ყოფილა — იგი საქართველოს თანაოკუპანტია და პუტინის საერთაშორისო განგრძობადი ბოროტმოქმედებისათვის კავკასიის კარის, რაც ჩვენდა სავალალოდ მას ებარა, გამცემლურად გამღები! სწორედ ამიტომ, რასაკვირველია, პუტინის ბანდიტიზმი სააკაშვილის „ალიბად“ ვერასგზით გამოდგება, არამედ პირიქით: სააკაშვილის ღალატი არის სწორედაც ერთ-ერთი ძირითადი საწყისი და მიზეზი იმისა, რასაც პუტინის დღევანდელი ამაზრზენი სახის შედეგად ვხედავთ!
დავით გადელია: სასაცილოა იმაზე საუბარი,
რომ ჩვენზე ვინმე გაბრაზდება — რატომ არ ვეკვეთეთ უზარმაზარ გველეშაპს!
— ყველას გონება და გულისყური მაინც იქითაა და მეც ვიტყვი ორ სიტყვას: მსოფლიოს დიდ ნაწილში ომი აღიქმება ტელევიზორში გადმოცემულ ნიუსად, რაღაც ვირტუალურ სიუჟეტად — როგორც ფილმი, ისე! ამიტომაც ისე ვერ მიაქვთ გულთან. მხოლოდ ვისაც უშუალოდ დაგვტაკებია ეს უბედურება — იმ ქვეყნებმა ვიცით და ზოგჯერ ჩვენც კი გვავიწყდება და ჩვენც კინოსავით ვუყურებთ, სანამ გვერდითი შედეგები მაინც არ შეგვეხება, თუნდაც ლტოლვილების სახით… როგორ განვიცდი იმ ადამიანების მდგომარეობას, ვინც უშუალოდ კონფლიქტის პირას ცხოვრობს! ყოველ წუთიერი მოლოდინი დიდი უბედურების, ოჯახური ტრაგედიის, დაწყობილი საცხოვრებელი არიალის არევის, ძალადობის შიში! საშინელებაა! მეომრისთვისაც, ცხადია, მაგრამ განსაკუთრებით, მშვიდობიანი მაცხოვრებელისთვის. ისეთი რა სტრატეგიული მიზნები უნდა გქონდეს ქვეყანას — უფრო ზუსტად კი მის მეთაურს, რომ მისი გადაწყვეტა ცეცხლით, მახვილით ან ხოცვა-ჟლეტვით გიღირდეს! მე უფრო სხვაგვარად დავსვამდი საკითხს: რამხელა დეგენერატი უნდა იყო ადამიანი (კაცის თქმა არ მომინდა ამ შემთხვევაში), რომ 21-ე საუკუნეში ასე აზროვნებდე! სრულიად დარწმუნებული ვარ, რომ მალე მოვა დრო, როცა ომი ჩაითვლება არქაულ, კაცობრიობის არსებობაში სრულიად მიუღებელ მოვლენად და როცა ქვეყნის მეთაური გქვია, რატომ ვერ უნდა მიხვდე, რომ ძალიან ახლო მომავალში გაბატონდება ეს იდეა და ჩაითვლები სრულიად დეგენერატ მმართველად?!
ან რაში აწყობს რუსებს ეს საშინელი სიბრიყვე?! ძალიან ხშირად აღნიშნავენ, რომ ეს სჭირდება პუტინს საკუთარ ქვეყანაში რეიტინგისთვის. არა მგონია, მართალი იყოს ეს გათვლა. როცა კავკასიელებს, ან თუნდაც ევროპელებს ებრძვიან, რუსულ „ბიდლოს” აქვს გარკვეული ველური ჟინი და ერთიანი აგრესიული სულისკვეთება, მაგრამ როცა სლავებს, ფაქტიურად ძმებს ებრძვიან — მილიონნაირი გადახლართული ნათესაური კავშირებით, მათ „ბიდლურ“ გონებაშიც კი, პროპაგანდის მიუხედავად, გაიხრჭიალებს ეჭვნარევი აზრი: „არიან კი უკრაინელები ჩვენი მტრები?“ დარწმუნებული ვარ, ეს ეჭვი ახლა ყველა რუსის თავში დაძვრება და ამას პროპაგანდა ვერ გადაფარავს! ეს რომ იყოს წამიერი დაშინება, რომელსაც მოყვებოდა უკრაინის უხმო დანებება, როგორც ყირიმის შემთხვევაში — მაშინ, კი ბატონო! წარმატებული მანევრი თავის „კრიმ ნაშ”-ით, მართლაც ასწევდა ხელისუფლების რეიტინგს. ხოლო ახლა ასე არანაირად არ იქნება! ომი თუ დაიწყო — მალე არ დამთავრდება, გაიწელება, დიდ დანაკარგად დაუჯდება რუსეთს და გარკვეული გამარჯვებების შემდეგაც სულ საომარი და არასაცხოვრებელი გახდება წართმეული ტერიტორია! ომი გადაიქცევა საბრძოლო ჭაობად, რომლიდანაც რუსეთი დიდხანს ვერ გამოვა. ავღანეთზე უარეს ჭაობად. დარწმუნებული ვარ, საბრძოლო მოქმედებების დაწყების შემთხვევაში, კიდევ უფრო დაეხმარება დასავლეთი იარაღით უკრაინას. რუსებს ტანკები ფაქტიურად აღარ შერჩებათ! ზელენსკი, ისევე როგორც ძალიან ბევრი ადამიანი, მშვენივრად ხვდება, რომ ასეთი სცენარით განვითარება ძალიან წამგებიანია, განსაკუთრებით ორი ქვეყნისთვის — რუსეთისა და უკრაინისთვის! ამიტომ, რა თქმა უნდა, მადლობელია საომარი დახმარებისთვის, მაგრამ ომს ურჩევნია ისეთი გადაწყვეტილება მიიღოს ევროპამ, რითაც პირდაპირ დაუკარგავს მადას რუსეთს, რის შემდეგაც რუსეთს ეცოდინება, რომ პირდაპირ სრულიად ევროპას, ნატოს ეომება! გინდა თუ არა, სხვა შემთხვევაში მახსოვრობიდან ამოტივტივდება თუნდაც ინგლისის მოქმედება მეორე მსოფლიო ომის დაწყებამდე — როცა ყველა ცალ-ცალკე ცდილობდა „მოეგვარებია” ჰიტლერთან და ასე გაათავხედეს და წააქეზეს ის მოქმედებებისკენ. გინდა — არგინდა, გიჩნდება ეჭვი, რომ დასავლეთს სურს რუსეთის რიცხობრივი უპირატესობა შეიარაღებაში გაათანაბროს მაღალი ხარისხის იარაღით და „სხვისი ხელით“ მაქსიმალურად დაასუსტოს, სისხლისგან დაცალოს რუსეთი, ამავე დროს, პარალელურად აუცილებლად შეეცდებიან რუსეთის შიგნით მდგომარეობის არევას — სიტუაციაც სათანადო იქნება და ეგებ ამ ბოროტების იმპერიის დაცემაც მოხდეს. ყველაფერი ეს გასაგებია, მაგრამ ზელენსკი, ცხადია, ხვდება, ვის და რის ხარჯზე მოხდება ეს! ამიტომაც საყვედურობს დასავლეთს… რაც შეგვეხება ჩვენ, ჩვენი კონტრიბუცია ამ ომში შეუძლებელია დიდი იყოს — უბრალოდ, პატარა ქვეყანა ვართ! ცხადია, მშვენივრად იციან ეს უკრაინელებმაც და სასაცილოა იმაზე საუბარი, რომ ჩვენზე ვინმე გაბრაზდება — რატომ არ ვეკვეთეთ უზარმაზარ გველეშაპს!
ძალიან დიდი იმედი მაქვს, რომ პუტინი გამიზნულად ატყუებს თავის ხალხს და თავად არ სჯერა იმ პარანოის, რაც ფორმალური ლოგიკით გადმოსცა (რაც სრულიად ჯდება პარანოის სტრუქტურაში)! თუ არა და ძალიან დიდ საფრთხეშია მსოფლიო და პირველ რიგში — ჩვენ, ორი ქვეყანა, რადგან ფსიქიურად არაჯანსაღი ადამიანის ხელშია უზარმაზარი სამხედრო არსენალი.
ამ პარანოის ცენტრალური ბოდვაა, რომ დასავლეთის ქვეყნებს უნდათ რუსეთის საომარი გზით განადგურება! ამ საწყის თეზას თუ ვინმე მიიღებს როგორც ფაქტს და მის მიმართ არ ექნება გონებას კრიტიკა — დანარჩენი თავისთავად ეწყობა ლოგიკურად, როგორც კლასიკურ ბოდვაში. სამწუხაროდ, სუგესტიურ, დაბალი განათლების ადამიანებს ისედაც ნაკლებად აქვთ გაბატონებული აზრის მიმართ კრიტიკა. რუსეთში კი ასეთი ძალიან ბევრია… ღმერთო გვიშველე!
