როგორც თურქეთის საგარეო საქმეთა მინისტრი მევლუთ ჩავუშოღლუ აცხადებს, 29 მარტს, სტამბულში გამართულ მოლაპარაკებებზე უკრაინისა და რუსეთის წარმომადგენლება ომის დაწყების შემდეგ ყველაზე დიდ წინსვლას მიაღწიეს. ინფორმაციას „ბიბისი„ ავრცელებს.
რუსეთი ამბობს, რომ რადიკალურად შეამცირებს სამხედრო აქტივობებს კიევის და ჩერნიგოვის მიმართულებით. ამის შესახებ რუსეთის თავდაცვის მინისტრის მოადგილემ ალექანდრ ფომინმა მედიასთან საუბრისას განაცხადა.
ამასთანავე, უკრაინა მზად არის გამოაცხადოს ნეიტრალიტეტი იმ შემთხვევაში, თუ უსაფრთხოების გარანტიებს მიიღებს. ნეიტრალური სტატუსის გამოცხადების შემთხვევაში უკრაინა არცერთი სამხედრო გაერთიანების, მათ შორის, არც ნატოს წევრი არ გახდება. ასევე, უკრაინის ტერიტორიაზე არ შეიქმნება სამხედრო ბაზები. უკრაინის უსაფრთხოების გარანტორები შესაძლოა პოლონეთი, ისრაელი, თურქეთი და კანადა გახდნენ.
რუსეთის თავდაცვის მინისტრის მოადგილის თქმით, სტამბულში გამართული მოლაპარაკებების ფონზე მიღებული გადაწყვეტილება მხარეებს შორის სამომავლო მოლაპარაკებების მიმართ ნდობის გაზრდასა და უკრაინასთან სამშვიდობო ხელშეკრულების მისაღებად აუცილებელი გარემოებების შექმნას ემსახურება.
„რადგან, მოლაპარაკებები ნეიტრალიტეტის და უკრაინის ბირთვული სტატუსის შესახებ, ასევე, უკრაინისთვის უსაფრთხოების გარანტიების მიცემის პროცესი პრაქტიკულ ფაზაში გადადის, დღევანდელ შეხვედრაზე განხილული პრინციპების ფონზე, რუსეთის ფედერაციის თავდაცვის სამინისტრო მხარეებს შორის ნდობის ასამაღლებლად, ასევე, საბოლოო მიზნის მისაღწევად — მაღლა ხსენებული შეთანხმების მისაღებად და ხელმოსაწერად — მივიღეთ გადაწყვეტილება, რომ რადიკალურად შევამციროთ აქტივობა კიევის და ჩერნიგოვის მიმართულებით“, — განაცხადა ფომინმა.
