21 თებერვალი მშობლიური ენის საერთაშორისო დღედ არის გამოცხადებული, რასაც იუნესკომ 2000 წლიდან ჩაუყარა საფუძველი. „ეს დღესასწაული არ ჰგავს 14 აპრილს, რომელიც უშუალოდ ქართულ ენას უკავშირდება, ეს გახლავთ მსოფლიოს საერთაშორისო მშობლიური ენის დღე“, — განმარტავს სახელმწიფო ენის დეპარტამენტის ხელმძღვანელის მოადგილე, პროფესორი თინათინ ბოლქვაძე.
„სახელმწიფო ენის დეპარტამენტმა, რომელიც მხოლოდ სახელმწიფო ენაზე არ ზრუნავს და გამოხატავს პატივისცემას საქართველოში გავრცელებული სხვა ენების მიმართ, დღეს ქ. თბილისის საკრებულოში მოიწვია საქართველოს ყველა ენობრივი უმცირესობის წარმომადგენელი, რომლებმაც თავიანთ ენებზე წაიკითხეს ლექსები (მაგალითად, რუსულ, ჩეჩნურ ენებზე); წარმოადგინეს ნაწყვეტები რუსული, აზერბაიჯანული და სომხური სპექტაკლებიდან. ასე რომ, დღეს, ბევრ ენაზე მოლაპარაკეს შევხვდით.
პარალელურად, საქართველოში დაბეჭდილი სხვაენოვანი მწერლების გამოფენა იმართება, სადაც წარმოდგენილია სომხური, აზერბაიჯანული, ოსური წიგნები; ქართულ-აფხაზური, ქართულ-სომხური, ქართულ-აზერბაიჯანული ლექსიკონები, რომელთაც სასწავლო მიზნების გარდა, სამეცნიერო და აკადემიური დანიშნულება აქვთ. ჩვენი მხრიდან სწორედ ამ ღონისძიებების ორგანიზებით გამოვხატავთ თანადგომასა და პატივისცემას საქართველოში მოსახლე ყველა ენაზე მოლაპარაკე ადამიანის მიმართ“, — აღნიშნა თინათინ ბოლქვაძემ.