— რას უნდა ნიშნავდეს ამ დროს უკრაინის ელჩის გაწვევა და ხომ არ ქმნის ეს ფაქტი საქართველოსთვის დამატებით საფრთხეებს?
— ელჩი კონსულტაციის მიზნით გაიწვიეს და ეს ნიშნავს დიპლომატიური წარმომადგენლობის დაბალ დონეზე დაყენებას და პოლიტიკური პროტესტის გაცხადებას. ამის შემდეგი ნაბიჯი კი იქნება დიპლომატიური ურთიერთობების შეწყვეტა. „საქართველოს მთავრობის ამორალური პოზიცია სანქციების საკითხში და მოხალისეებისთვის ხელის შეშლა“ — ზუსტად ასე განმარტა პრეზინდეტმა ზელენსკიმ ელჩის გაწვევის მიზეზები. პასუხად რაც მოხდა, ესაა პოლიტიკური გაფრთხილება, ანუ „წითელი” ნიშნის დაფიქსირება. კონსულტაციების ფორმატში უკრაინის ელჩი საქართველოში შეხვდება პრეზინდეტს და მოახსენებს სიტუაციის შესახებ, შემდეგ დაელოდება ნებას, რომ დაბრუდნეს უკან — ეს არის სულ.
— როგორ იქნება ეს ფაქტი დასავლეთის მხრიდან აღქმული, მითუმეტეს მაშინ, როცა დღეს ბრიუსელში, ევროკავშირში უკრაინის გაწევრიანების საკითხზე მსჯელობენ და იქ არის საქართველოს პრეზიდენტიც?
— იქნება საკმაოდ უარყოფითი შეფასებები, რადგანაც ჩვენ გაგვათანაბრეს ყირგიზებთან, რომლებმაც მხარი დაუჭირეს კრემლს, მეტიც, მგონი არის არაფორმალური ინფორმაცია იმის შესახებ, რომ თითქოს მათ სამხედრო კონტინგენტიც კი გააგზავნეს რუსეთის დასახმარებლად. დიახ, ზელენსკიმ ხაზგასმით ახსენა ყირგიზეთი და საქართველო.
ფაქტობრივად, ეს ნიშნავს იმას, რომ ჩვენ უკვე ვაწარმოებთ ნეიტრალიტეტის საგარეო პოლიტიკურ კურსს. შეიძლება ამან ხელი არ შეგვიშალოს ევროკავშირში გაწევრიანებაზე, მაგრამ ნატოში გაწევრიანების პროცესში კი უკვე პრობლემები შეგვექმნება. ასე რომ, ევროკავშირში გაწევრიანების შანსი ჯერ კიდევ გვრჩება. დიდი ილიასი არ იყოს — რა გითხრათ და რით გაგახაროთ?!..
პ.ს. აღნიშნულ სტატიაში ჩვენ მიერ დაშვებული იყო ტექნიკური უნებური შეცდომა, რაც გასწორდა. რედაქცია იხდის ბოდიშს უნებური შეცდომისთვის.
