ეკონომიკურ სფეროში მოღვაწე მეცნიერებმა, მედიკოსების მსგავსად, პანდემიის პირობებში კატასტროფასთან გამკლავების გზების ძიებაში ვითარების საფუძვლები შეისწავლეს და ატიპიური კრიზისის სინდრომი აღმოაჩინეს. ამ გლობალური გამოწვევის შესახებ საკუთარ მოსაზრებას გვიზიარებს ეკონომიკურ მეცნიერებათა დოქტორი, პროფესორი, აკადემიკოსი ვლადიმერ პაპავა.
„კოვიდ-19-ის პანდემიამ ეკონომიკაში ისეთი ფენომენი ჩამოაყალიბა კრიზისის სახით, რომელიც თავად ეკონომიკაში შექმნილი პრობლემებით არ არის გამოწვეული. ვირუსი გაჩნდა მოულოდნელად, მოედო მთელ მსოფლიოს და მასთან საბრძოლველად უძლური აღმოჩნდა თანამედროვე მედიცინა. ქვეყნების ნაწილმა პანდემიასთან გამკლავება საზოგადოებრივი იმუნიტეტის გამომუშავების იმედად გადაწყვიტეს და უარი თქვეს შეზღუდვების შემოღებაზე, თუმცა ინფექციის გავრცელების კერებად ცნობილმა ქვეყნებმა მალევე მიმართეს მკარც შეზღუდვებს: შეაჩერეს ავიამიმოსვლები, დაიხურა სკოლები და უნივერსიტეტები, შეწყდა საზოგადოებრივი ტრანსპორტის მიმოსვლა და ა.შ. პრაქტიკულად, ეკონომიკა გაჩერდა და აღმოჩნდა, რომ სახეზეა ეკონომიკური კრიზისი, მაგრამ თავი და თავი ის არის, რომ ეს კრიზისი ეკონომიკაში არ ჩასახულა! ანუ ამ კრიზისის საფუძველი არ არის ეკონომიკა, ეს კრიზისი შექმნა თანამედროვე მედიცინის უსუსურობამ — დაამარცხოს „კოვიდ-19“, შეაჩეროს პანდემია, შეაჩეროს ვირუსის გავრცელება. სხვა სიტყვებით რომ ვთქვათ, ეს არ არის ტიპიური ეკონომიკური კრიზისი, ის ატიპიური კრიზისია. ატიპიური კრიზისის მაგალითია მეორე მსოფლიო ომის დროს ქალაქების ნგრევით გამოწვეული კრიზისები, საზოგადოებრივი წყობის ცვლილებების დროს გამოწვეული კრიზისები, როცა არსებული ეკონომიკური სისტემა ჩაანაცვლა ახალმა. ჩვენ შემთხვევაში „,კოვიდ-19“-ით გამოწვეული კრიზისის დროს არანაირი ცვლილებები არ მომხდარა. დაიხურა ობიექტები, რომელთაც ფიზიკურად აღდგენა არ ესაჭიროებათ. ყველაზე ახლოს ამ კრიზისთან დგას მე-20-ე საუკუნის 20-იან წლებში ესპანური გრიპის პანდემიით გამოწვეული კრიზისი. მსგავსება იმ პანდემიით გამოწვეულ კრიზისსა და დღევანდელობას შორის საკმაოდ დიდია. მაგრამ, აქაც არის სერიოზული განსხვავება: მაშინ ტურიზმი ისეთი განვითარებული არ იყო, როგორც დღესაა, თანაც სამოქალაქო ავიაფრენებიც ახალი დაწყებული იყო… ამიტომ შეიძლება დავასკვნათ, რომ დღეს ჩამოყალიბდა უნიკალური, ძალიან განსხვავებული რამ და აღმოჩნდა ყველაზე მთავარი: ჩვენ გვაქვს ეკონომიკური კრიზისი, რომლის დაძლევის მექანიზმიც ეკონომისტებს არ გააჩნია… რადგან, ეს კრიზისი ეკონომიკაში არ ჩასახულა. ამ კრიზისის დაძლევის მექანიზმი მედიცინაშია. სანამ მედიკოსები არ დაამარცხებენ „კოვიდ-19“-ს, სანამ ეს პანდემია დაძლეული არ იქნება, მანამ ეს კრიზისი გაგრძელდება. ამიტომ, დღეს, ეკონომიკა არის მედიცინის მძევალი! ეკონომისტები, პირველ რიგში, ვუყურებთ იმას, თუ რას გვთავაზობენ მედიკოსები, თუმცა ეს სულაც არ ნიშნავს იმას, რომ ეკონომისტები გულხელდაკრეფილები უნდა იყვნენ: ეკონომისტთა მთავარი ამოცანაა კრიზისით დამძიმებული ეკონომიკური მდგომარეობის შემსუბუქება, რასაც პსოტპანდემიურ პერიოდში ძალიან დიდი მნიშვნელობა ექნება“.
